德國寶「超級全能飯煲」- 老火湯 & 炆排骨

上星期收到新玩具，係Compass Visa的迎新禮品— 德國寶的「超級全能飯煲」。

坦白講，我一直對這個品牌無特別的好感 ^^'，亦都好驚用任何壓力煲或真空煲，因為硬係覺得好似好危險咁。但係，所有負面印象竟然因為一煲湯而徹底改變咗！女人都係⋯⋯比較善變。(☆_☆)

收煲後的第二天，我決定要煲「花膠螺片青紅蘿蔔煲瘦肉」為這個「超級全能飯煲」開光！一切準備就緒，我按下了「煲湯」鍵，三十分鐘之後，竟然，竟然真的和老火湯一樣！！（似用慢火煲了近三小時的感覺）天啊！我即時有種相逢恨晚的感覺！（但依然會諗壓力煲會唔會爆炸嘅問題。我認我係好細膽架。(￣▽￣)）

老火湯

之後，天文台話氣溫即將驟降，我「拿拿林」去街市買來紅+白蘿蔔和排骨，試試用十五分鐘炆個排骨煲迎接寒風！結果⋯⋯

呢個超級全能飯煲果然好給力！十五分鐘就已經將蘿蔔炆到冇牙阿婆都食到咁「林」。最開心嘅係愛人猛讚好食好食，仲問我會唔會炆其他嘢佢食！♪( ´▽｀)（心心眼！）

炆排骨食譜

材料

瘦瘦瘦排骨250克（我在惠康買$25）

紅蘿蔔一條

白蘿蔔一條

蠔油六湯匙

冰糖兩小粒

（五蚊銀大）

八角兩粒

薑蔥適量

味琳/酒一湯匙

油兩茶匙

鹽適量

生粉水少許

做法

1. 蘿蔔去皮切件。

（用壓力煲的話，請切大件。）

2. 熱鍋下油，爆香薑蔥。

3. 加入排骨略炒。

4. 倒入一杯水、所有蘿蔔、蠔油、冰糖、八角，用燉肉模式炆15分鐘。（如非用壓力煲，則要用小火炆大半小時至入味。）

5. 加入適量味琳和鹽調味。

6. 加入生粉水收汁即成。

小貼士

1. 排骨點都會有少少肥，我回家後會切去眼見到的肥膏。脂肪率較高的朋友請限量進食。

2. 可考慮「飛水」去油脂。

3. 此食譜的調味較為清淡健康，請按個人口味適度調整。

全能飯煲跟機有一本小小的食譜，教人怎樣用它來炆牛腩、煲海鮮粥、煮糖水和製作糕點等等。有機會真想將每一個mode都試試！不過，Philips的製麵機還未開光！我要多多努力，為大家試多啲不同的小家電。＼(^o^)／