Kay仔同你去濕平（好味健康食品介紹）

又到咗好多朋友都好鍾意嘅環節嘞-- Kay仔同你去濕平！究竟呢排又有啲乜嘢新嘅健康產品出爐呢？買唔到我介紹嘅產品有乜計？文末有小心得分享！^_^

1. 日本版合味道'Light'杯麵 $13.9@一田超市

表面上比同系嘅杯麵較低卡路里同脂肪（主要因為佢嘅份量相對比較少）。值得留意嘅係，一杯嘅鹽分已經接近成年人一日嘅上限，同埋個麵都係炸嘅⋯⋯ 所以其實都只有重量方面light咗~~^^'

2. AGF Blendy Stick 1/2 低卡即溶咖啡 $26.9 @ 味之誘惑

諗咗好耐先決定要推薦比大家。哈！因為係真心好味又低卡，我驚推薦完之後我自己反而買唔到Y(^_^)Y。鍾意飲較香濃咖啡嘅朋友，可以去碰下運氣喔。

3. 康力施洛柚子味零卡蒟蒻 $9.9 @ 百佳 （日本貨品部）

夏天 + 減肥 + 口痕 @office = 零卡小食。^_^

4. jax coco 100% 純椰子水250毫升 $21.9-$24 @ 一田及Starbucks

如果冇天然嘅椰子水或者椰皇水，咁飲呢啲現售嘅都OK~ 完全天然同冇添加糖。每樽50千卡。以後喺Starbucks又多一個選擇啦。

5. CHI 100% 純椰子水330毫升 $26 @ 一田超市

都係冇添加糖嘅，每盒63千卡。

6. 金廚牌泰式貴刁（清湯 / 冬蔭功味）@ 各大超市

早餐除咗麥皮、麥包、水煮蛋、米粉等等之外，間中都可以食貴刁，油包可以直接掉落垃圾桶，而味粉就落一半就好嘞，否則又係驚水腫到飛起囉。^_^

7. 壽桃牌非油炸即食麵（蔥香雞肉 / 九州豬骨味）@ 各大超市

早餐嘅另一選擇係壽桃牌嘅非油炸即食麵。熟悉我嘅朋友都知道，我一直都係壽桃牌嘅忠實擁躉。可惜，今次真係有啲失望啦。話說佢裡邊嘅味粉包同油包竟然係二合為一嘅！意味著我地          一係就完全唔好落任何味粉/味道，否則就會被迫食埋啲唔知咩油⋯⋯ 我唔知解呢兩隻味道嘅非油炸即食麵會有呢個安排，但對於用家嚟講就真係唔係太方便嘞。

8. 純乳酪 VS 純乳酪？

雀巢有兩隻純乳酪，無論係包裝、個名以至介紹有95%相似，咁究竟係有咩分別呢？綠色包裝嗰隻每100克有5克左右嘅糖，食落唔會有甜味，因為冇添加糖，標籤上嗰啲都只係嚟自奶本身嘅糖分。而藍藍地色嗰隻呢，就會有少少甜同多一倍多啲嘅糖架。下次整乳酪蛋糕或者雪條買料嗰時就要留意一下嘞。

***最後順帶一提，我其實幾乎每日都會收到讀者朋友話買唔到我介紹嘅產品。例如好多人都話好難買嘅Kraft Fat Free Mayo, 如果喺百佳門市搵唔到，其實可以試吓上網訂吖，我喺百佳嘅app/webpage都見到個產品。(Search: Fat Free Mayo)

祝大家愈買愈瘦！

名牌醫院心臟科極速減肥餐單

K for Kitchen瘦身雜貨店 (已開業~! ^^)

以後可更方便買到低卡小食及各皇牌減肥補充劑。

http://www.kforkitchenhk.com/

※◎♡※◎♡※◎♡※◎♡※◎♡※◎♡※◎♡※◎♡※◎♡

K for Kitchen 瘦身雜貨店 (有超多瘦身零食、減肥皇牌產品、養生茶飲等等)

http://www.kforkitchenhk.com/

《K for Kitchen 瘦身廚房》 部落格 / Blog

http://kforkitchen.blogspot.hk/

我的兩本著作：《愈食愈瘦》《愈食愈瘦 2》

http://www.cp1897.com.hk/product_info.php?BookId=9789888276776

Facebook 專頁 (睇更多健康食譜&食物介紹)

https://www.facebook.com/kforkitchenhk

Follow 我的 Instagram https://www.instagram.com/k_for_kitchen/?hl=en

※◎♡※◎♡※◎♡※◎♡※◎♡※◎♡※◎♡※◎♡※◎♡

簡介

餐單有好多種，以下呢款喺網上廣泛流傳嘅「名牌醫院心臟科極速減肥餐單」，就聲稱透過食物同身體之間嘅化學原理，達至身體自行燃燒脂肪的目標，從而幫心臟病人極速減磅，以便於短期內進行手術。

成效

有人試過十日減十磅，亦有人聲稱於兩個半月內減了五十磅。

詳細餐單

早餐

半個西柚

兩隻雞蛋

兩片煙肉

咖啡或茶一杯（不含咖啡因）

（西柚可榨汁、雞蛋則任何煮法均可）

午餐

半個西柚

沙律一大碗

肉類任吃

（ 西柚可榨汁、沙律醬任吃、肉類則任何煮法均可）

咖啡或茶一杯（不含咖啡因）

茶點

脫脂奶或蕃茄汁一杯

晚餐

半個西柚

沙律一大碗  或  蔬菜一大碗（煮法不限）

肉類（魚肉為佳）任吃

（ 西柚可榨汁、沙律醬任吃、肉類則任何煮法均可）

茶一杯（不含咖啡因）

***呢個餐以連續十二日為一個cycle, 休息兩日之後可按需要繼續。所有肉類和蔬菜基本上任吃。

***注意事項***

1）不可以隨意加減餐單內的項目。餐單的設計是以不同食物的組合，令身體自行燃燒脂肪。其中西柚十分重要，因為它是啟動身體燃燒脂肪程序的催化劑。

2）為免阻礙脂肪燃燒，請儘量不要喝含咖啡因的飲品。

3）餐與餐之間不要進食。

4）餐單中是避免進食糖、澱粉質；亦不可進食甜品、麵飽、甜薯等食物。

5）蔬菜類不包括：白色蔬菜類、蕃薯、薯仔、白色洋蔥及芹菜等。

6）可吃蔬菜包括：紅椒、紅蘿蔔、洋蔥（紅或綠）、蕃茄、西蘭花、蘿蔔、青瓜、椰菜、生菜及菠菜等。

優點

1）名牌醫院餐單喎，聽落好似好有保證咁？

2）可以「吃到飽」，食量比較大嘅人都唔會覺得太辛苦。

缺點

1）低碳水化合物餐單的確會令人很快落磅，但反彈風險亦高。此外，呢個餐單含大量嘅肉類（脂肪），若果真的放任地吃的話，對心臟和其他器官恐怕也會有負面的影響。

2）減重效果即使理想，如不徹底改善飲食習慣，往後反彈的機會也不低。

Kay's 23/6

同大家分享我今日做過啲咩先。

一早起身第一件事就係拍片。今日又係超開心，我覺得我嘅「演出」好有突破！你睇下導演同埋兩位攝影師幾咁認真就知條片出嚟一定會好好笑，想知點解要拍到用晒保鮮紙保護個鏡頭，啲片出街嘅時候就請多多支持嘞。

第二件事係去做我最鍾意做嘅帶氧+負重運動-- 行街！！！^^係呀，我好鍾意連續三四個鐘唔停咁行街，仲要買到一手都係，務求令到自己行多啲行快啲。我減磅嗰時都係靠呢招燃燒額外嘅卡路里，順便又可以為咗每星期嘅進步（藉口）而奬勵一下自己。

除咗買新衫之外，今日仲去咗宜家傢俬，發現咗呢個整雪條嘅恩物！有藍綠或粉紅黃兩隻色，唔洗$20一個。最重要嘅係，你鍾意食邊條就溶邊條，唔使吓吓一次過全部拎晒出嚟再等佢溶咁唔衛生。

最後，梗係要去我最鍾意嘅超市啦。除咗新鮮椰皇水之外，其實超級市場裡面仲有好幾隻無添加任何糖分或者古怪成份嘅椰子水！MEKO呢隻都OK飲得過！此外， Starbucks都入咗一隻玻璃樽裝嘅椰子水，嗰隻都係無添加糖，算係健康之選。

最最最後，大家知道相中的三款乳酪有甚麼最大的分別嗎？如果要做乳酪蛋糕，最健康應該揀邊隻你又知唔知呢？要做到「愈食愈瘦」，就要多啲睇營養標籤嘞。

完全無油免搓高纖香草麥包 (加添奇亞籽)

如果屋企冇麵包機又唔想左搓又搓再等發酵，呢款麵包就晒啱你嘞。^_^

呢款充滿歐陸口味、外脆內軟嘅香草麥包，準備時間只需5分鐘搞掂！放喺雪櫃裡面發酵一晚之後，隨時想食隨時拎出嚟焗就OK!! 

材料
高筋麵粉250克
全麥麵粉100克
速發乾酵母1.5茶匙
脫脂奶粉2湯匙（可略）
鹽3-4克
香草（任何）2茶匙
40度暖水320毫升
奇亞籽1-2湯匙

做法
1. 高筋粉過篩。（我太懶！永遠都跳過呢個step! ^^）
2. 加奶粉、酵母、鹽、奇亞籽和香草。
3. 加暖水拌勻。
4. 將濕潤的麵糰放入保鮮盒/袋中，蓋好蓋/保鮮紙，室溫發酵1小時。
5. 將麵糰放入雪櫃過夜或數小時。
6. 烤焗前從雪櫃取出麵糰。撒麵粉在枱上，將麵糰搓成長條形。
7. 之後將摺口收好向下。室溫再放1小時。
8. 完成最後發酵前10分鐘，焗爐預熱至220度，放1杯水入焗爐內。
9. 入爐前可於包面𠝹幾刀，焗25-30分鐘即可。

食極唔肥高纖肉醬焗意粉焗飯

一睇啲材料就知道卡路里高極有限，配埋百佳有得賣嘅有機無鹽番茄意粉汁（有時間可以自己整埋） ，想肥都好難啦！

材料（3人份量）
洋蔥兩大個
迷你番茄一盒
甘筍兩條
羅勒適量
有機無鹽番茄意粉汁
減鈉鹽適量
黑椒適量
蒜片適量
蒜粉或蒜鹽適量
瘦肉碎$20
油2-3茶匙
水適量
（焗飯時可按減磅進度加隻蛋或低脂芝士喺面）
做法
1. 所有材料洗淨切細粒。
2. 熱油鑊，爆香蒜片和洋蔥。
3. 炒肉碎至七分熟後，加入其他材料煮滾。
4. 收細火煮至所有材料熟透。請視乎情況加水同煮。
5. 加入調味料，有需要的話可開中至大火收汁。

小貼士
1. 材料的變化可以有很多，沒有肉碎，可以用低脂火腿（但加工食品始終沒有鮮肉那麼健康，這點要多多注意哦。）喜歡的話，也可以加入菇菌類增加纖維和香氣。

香港首間MUJI Bakery + MUJI Cafe + MUJI @ 合和中心新店

上星期五到了剛於六月開幕，位於灣仔合和中心的Café & Meal MUJI吃午餐。作為日本以外的第一間MUJI BAKERY，我最期待的，當然就是他們的麵包和蛋糕啦。

這間MUJI分為三個部分：MUJI（主要售賣食物和食器）、MUJI BAKERY（全日本也只有南青山、有樂町等幾家分店！）和MUJI CAFE（香港第二分店）。

午餐餐牌

惹味非常的甜椒醬炸雞（好juicy!!）

滑滑嫩嫩又酸酸甜甜的黑醋醬豚肉

番茄露筍鯖魚

和銅鑼灣的MUJI CAFE不同，這樣有許多有禮的waiters serve食客，不用自己取餐。食物都是一貫的和食：冷盤都是以沙律、涼拌及醋漬等為主。熱食方面，選擇沒有銅鑼灣分店的多，但甜椒醬炸雞、黑醋醬豚肉和番茄蘆筍鯖魚等的主煮食也非常出色。餐飲有咖啡和凍頂烏龍茶可選，跟餐加$15一杯。

至於bakery部分，店內日系、歐陸系麵包有50款，近半數的款式與日本一樣，採用日本小麥粉搓製麵糰。許多材料都標明由日本入口，想吃100%日本味道的朋友，就不要錯過以「十勝紅豆、南瓜、牛蒡和蓮藕」等材料焗製的麵包喔。其實除了麵包，bakery內還有新鮮三文治、鬆餅和多種不同口味的麻糬等等。

Scones in green tea and original flavor

當日買了雜穀麵包、小全麥包、黑豆沙包、黑芝麻黃梅合桃包、枝豆法包、十勝紅豆包、原味及抹茶鬆餅和袋裝麻糬等等。（全部合共$155左右）

賣相討好的蔬菜意大利包、法包和野菜火腿／香腸三文治等

當日買了好幾款麵包，感覺全部都真材實料，沒有聖X娜和美X等大型連鎖麵包店的空心情況。不過，聲稱鹽分較少、較淡口的MUJI麵包，不知怎的，到了Kay的嘴裡，仍然是覺得太鹹⋯⋯吃了不久就好想喝水。^^ 哈，試過之後可以告訴我你有沒有同感。

總的來說，MUJI的麵包沒有令我失望但也沒有太大的驚喜。價格定位方面似乎比日本還要貴（應該是香港的土地問題吧？）Y(^_^)Y，未試過MUJI Bakery出品的朋友，建議不用專程去朝聖，但如果剛好路過的話，那就不妨買幾款麵包嘗嘗哦。

Café & Meal MUJI

地址：灣仔皇后大道東183號合和中心地下

電話：3971 3280

營業時間：11am-10pm

官網：http://www.muji.com/hk/flagship/hopewell/

美心冰粽（水果味）試食報告

端午節想食糭但係又怕肥，可以試吓呢啲新派嘅冰粽。（不過過節食一隻半隻粽都唔會真係即刻肥一兩磅！只要唔係日日食就得。）^_^

我用現金價$45買咗一盒四隻美心嘅水果系列冰粽。返到屋企即刻打開蘋果味試一試。唔⋯⋯

所有冰粽嘅油份都極低，但你都應該估到佢哋嘅糖份好高。^_^不過由於每一隻冰粽都係細細粒（我量過係不足60克），所以卡路里唔算好高，以我食咗嘅蘋果味嚟講，每隻就大約有120千卡。

當然，我完全唔覺得呢粒嘢同粽有任何關係。你話係糯米糍或者冰皮月餅我會覺得更貼切。當過節攞個意頭OK~~ 但我都係鍾意食梘水粽同鹹肉粽多啲。

《與家人用膳系列》- 清蒸龍躉伴有機迷你紅蘿蔔

《與家人用膳系列》

曾經有讀者朋友說，由於她幾乎天天都會和家人晚膳，因此覺得減磅計劃實行起來並不容易，因為不可能要全家人遷就她吃得那麼清淡呀。

大家都有類似的經驗嗎？其實，家人的支持真的很重要！可以的話，請他們跟你一起多吃一些蒸焗的菜式啦。就算他們不需要減磅，吃得清淡一點，對身體都有數之不盡的好處。

但話又說回來，究竟有沒有一些菜式是適合減磅的朋友和家人一起享用的呢？哈！答案當然是有啦。

今晚要介紹的是「清蒸龍躉伴有機迷你紅蘿蔔」！紅蘿蔔是我在曉峰訂的，星期一和同事「分贓」已經是我們的例行公事哦。

（之後還會有更多《與家人用膳系列》，敬請多多支持和分享哦。）

材料（2-3人份）

龍躉片1盒

有機迷你紅蘿蔔約20薄片

或金針黑木耳適量

薑片適量

熟油2-3茶匙

（減鈉）豉油少許

蔥花少許

醃料

鹽少許

豆粉1-2茶匙

糖1茶匙

麻油1-2茶匙

做法

1. 龍躉片用醃料醃好備用。

2. 鋪好薑片在碟底之後，放上紅蘿蔔薄片或金針黑木耳。最後加入龍躉片。

3. 水滾後隔水蒸4-5分鐘。

4. 蒸好後加入熟油和豉油即可享用。

LC無水蒸做法

1. 將紅蘿蔔薄片或金針黑木耳鋪在LC上。

2. 加入1.5湯匙水。

3. 水滾起計蒸4分鐘。

4. 焗1-2分鐘再加入熟油和豉油即可享用。

小貼士

1. 蒸魚時加入紅蘿蔔薄片或其他蔬菜，不但可以令整個餸菜的營養更均衡，更能將魚汁精華發揮到極致！食過一定會讚好！

2. 吃海鮮要顧及口感的話，「贊」熟油是無可避免的做法。食譜內的油份，大概是每人1-2茶匙左右。如果你想吃得更加清淡的話，可直接略去加熟油的部分。

3. 食譜中的龍躉片可以用其他魚片代替。

無油乳酪輕蛋糕（勁易做、超鬆軟）

減磅期間好想食蛋糕？

減磅成功又怕食甜品會好肥？

那Kay就必須大力向大家推介以下這款鬆軟無比的乳酪蛋糕！

材料非常簡單，唔肥又好味！即使是小朋友都可以食這款感覺細密、鬆軟又有蛋香的乳酪蛋糕！

材料（2個手板大份量）

大蛋3隻（每隻50克）

低筋麵粉60克

Yoplait Light 版各種果味乳酪120毫升

檸檬汁1茶匙

（代）糖1湯匙

又或者⋯⋯

材料

大蛋3隻（每隻50克）

低筋麵粉60克

純乳酪120毫升

檸檬汁1茶匙

（代）糖2.5湯匙

（我用Splenda可烘焙代糖）

做法

1. 蛋黃與蛋白分開盛於兩個盤子裡。

2. 將蛋黃和已過篩之麵粉及乳酪混合。

3. 用電動打蛋器將蛋白打至濕性發泡後再加入檸檬汁。

4. 分2-3次加入（代）糖於蛋白霜中，並繼續打至硬性發泡。

5.確保蛋白霜在倒扣盆子時已不會流下來。

6. 分2-3次將蛋白霜加到蛋黃麵糊中。注意要輕手切拌以免消泡。

7. 入爐前，將麵糊放在桌面上輕敲數下。

8. 放入已預熱150度的焗爐內焗40分鐘。

9. 最後，以180度再焗5-8分鐘讓蛋糕上色。

10. 焗好的蛋糕要倒扣放涼。冷凍或熱食均可。

小貼士

1. 可選任何口味的乳酪。相片中藍蓋的Yoplait無糖乳酪（含代糖）於Citysuper有售$14@。此乃微甜版本，可按個人口味增減代糖份量。

2. 檸檬汁的作用主要是去除蛋腥，不喜可略。