上海雪菜肉絲湯年糕

應承大家會分享晏晝喺公司食啲咩。

🌟🌟🌟記得記得要加「手標牌」嘅胡椒粉同少少蔴油！好味十倍架！🌟🌟🌟

是日午餐：

上海雪菜肉絲冬菇湯年糕

（湯同年糕分開裝，食嘅時候先撈埋一齊。）

😋繼續多菜少肉一碗五穀😋

雪菜乃醃製食品，淺嘗就好。

P.S: 肉類儘量唔好醃、湯就用一小盒清雞湯加大量水煮。

午餐瘦身飯盒攻略

好多朋友都問我，究竟平常我返學會食甚麼。帶飯會否很麻煩？無時間煮是否一定冇得瘦等等。

不如先睇睇我今日（29/7）嘅午餐。

題外話：

咦？老師暑假也要回校上課？

那當然啦！老師其實和7-11沒有分別，都是全年無休的。(￣▽￣)

YES YES~!! I AM A MIFFY FAN!!

由於工作的確很繁重，所以我也會使出很多「旁門左道」，儘量縮短煮食的時間，寧願把時間留來看書、做運動和跟大家交流一下。

好了，一起來看看自備午餐的要訣啦！

多菜少肉少味但又好豐富，想肥都好難！

 

1. 假日準備

週末可以做定一些比較花時間的菜式：藥膳滷牛腱+雞蛋、甘筍木耳冬菇炆瘦排、涼拌甜酸蘿蔔、冰鎮茄子同麻酸辣小青瓜之類都係我常常會預備嘅菜式。

2. 比例

留意菜飯同埋肉嘅比例 3:2:1

我用日式3合1飯盒，準備時就更方便。

對使用膠盒有顧慮的話，可以用分隔式玻璃飯盒。

3. 菜

不想每天都要準備很多菜帶返公司的話，可以和同事一起訂訂有機菜，放到雪櫃下格可以保鮮多天。我今日食嘅係喺曉峰訂嘅沙律菜。食佢地嘅菜我係從來唔會落任何醬汁，最多放少少黑椒，以免褻瀆咗佢神聖（甜、脆、多汁）嘅味道。類似嘅菜其實喺Starbucks, 7-11或OK都有，想食得健康其實真係唔難！

無論任何時候，每日都要食多啲菜，以維持腸道健康同埋飽肚感。

4. 飯

我會搵一日食糙米、一時又食下紅米加啲奇亞籽，跟住又會帶下意粉、蕎麥麵同凍烏冬。遲啲仲諗住開拓埋燜燒罐嘅世界！（整粥整湯都好似好得咁！）

高纖嘅五穀能夠延長飽肚感，變相可以有效瘦身。

5. 點食？

食飯前約十五分鐘，我會飲一至兩杯水。

想愈食愈瘦，記得要儘量預留充裕嘅時間食飯，仲要專心坐定專注咁慢慢食。

如果係一邊工作又或者一邊煲劇一邊進食嘅話，好容易食完會唔知道自己食咗乜嘢，又或者覺得自己根本冇乜食過啲乜嘢而好快又會再食多餐⋯⋯

記住，要細嚼慢嚥先能夠享受到食物嘅味道同有滿足感，咁就冇咁易好快又想食嘢嘞。

最後，由於Facebook又有新搞作，懇請大家喺Office用電腦上一上我嘅Facebook, 照住呢張相片上邊嘅指示，選擇返SEE FIRST, 咁就唔會收唔到我嘅updates啦。感謝大家。

17週年紀念

🌟🌟✨✨放閃時間✨✨🌟🌟

好多謝呢個傻瓜，我十幾歲喺出版社做兼職嘅時候就認識咗佢。

星期六係我地相識🎈17週年紀念🎈，好想好想公開多謝佢咁多年嚟，無論我咩身形、咩脾氣（主要就係「壞」）、咩長相都一樣對我咁好！我認我係幾生修道+眼光唔錯。😛✌🏼️

如果仲有下一世同下下一世同下下下一世，我一定一定都會揀你，繼續錫你同每日悉心照顧你，直到永永遠遠、生生世世。

※驚嚇度100%嘅舊相重溫※ (共8張)

※驚嚇度100%嘅舊相重溫※ (共8張)

因為《飲食男女》拍攝短片嘅需要，我又摷返啲153+磅嘅相出嚟...... (部分睇起嚟好似比較「瘦」^^" 完全係鏡頭同角嘅問題咋，我當時真係愈肥愈食、愈食愈肥。)

肥唔單止係外表嘅問題，仲對情緒同健康都有負面嘅影響。如果你都想開始減磅大計，可以考慮花4星期減4-8磅先。目標定得太高或者太遠反而會令人想放棄架。

有咩問題可以留言大家傾吓吖。

我對大脾真係好強橫!!

當時真係就嚟要坐兩個位~!

個肚腩大到縮都縮唔到...... 頂到一個點係...... 你地自己睇嘞~

呢個角度都影到塊面肥腫難分......

500円任夾......
我又狂食啦~

咁健康呢碗唔係我架~~ ^^"

成日都要著D好鬆身嘅衫~
巴士定地鐵都有人讓座俾我......

16:9呀!!! 我塊面~!

馬莎無糖橡皮軟糖

馬莎無糖橡皮軟糖（$18/50克）

馬莎不時都有啲好嘢！除咗好味低卡茶餅、一系列嘅較低卡低脂嘅薯片、無糖硬糖同無糖香口珠等等之外，仲有最新推出嘅無糖橡皮軟糖。

優點

1. OK好味

2. 無「真糖」

3. 較其他橡皮糖低卡

4. 一包有齊四隻果汁口味

「缺點」

1. 價格不便宜

（拍照前我吃了兩粒+相片中的份量就要$18@）

2. 每小包就已經有125千卡

（注意很多代糖食品並非一定是零卡路里）

*代糖雖然安全，但都不應該多吃，以免養成對甜味的依賴。

**多謝熱心讀者朋友Ellen Shu報料

***同場加映：今個星期六同日（即係聽日同後日）， 759會有 6 6 8 9折！

冰鎮茄子（原味/麻辣版）

今日市區氣溫34度！唔使我多講，大家都應該知道香港已經踏入咗每年最最最熱嘅個半月。13/7乃係初伏日，嚟緊嘅大約50日都會好熱。中醫建議大家係呢段時間，千祈唔好飲冰凍嘅飲品同食太多生冷嘢，以免寒氣入侵體內。

話雖如此，如果我而家話做羊腩煲或者紅酒燉牛尾，相信大家都只會想打我。^_^ 咁我唯有繼續做我嘅涼拌啦，繼大獲好評嘅青瓜之後，今次嘅主角係茄子！

材料
茄子（我用幼身嗰隻）3條
冰水1大碗

醬汁
陳醋1湯匙
生抽2茶匙
糖1茶匙
花椒油1茶匙（可用麻油代替）
蒜蓉2茶匙
指天椒1隻或辣椒粉適量（可略）
芫荽或蔥花適量（可略）

做法
1. 茄子洗淨切條。
2. 煮一煲熱水，水滾後加入茄子煮約三分鐘。
3. 煮好後立即把茄子放到冰水裡冰鎮三分鐘。
4. 把冰鎮好的茄子瀝乾水。

5. 醬汁調好之後，淋上已冰鎮好的茄子上即可。

小貼士

1. 此乃即食菜式，無需預留時間醃製。

2. 調好汁之後，可先試味並調校至自己最喜歡的辣度 / 味道。

3. 醬汁內有少量糖和油，因此儘量不要吃太多。

※◎♡※◎♡※◎♡※◎♡※◎♡※◎♡※◎♡※◎♡※◎♡

K for Kitchen 瘦身雜貨店 (有超多瘦身零食、減肥皇牌產品、養生茶飲等等)

http://www.kforkitchenhk.com/

Kay的兩本著作：《愈食愈瘦》《愈食愈瘦 2》

Facebook 專頁 (睇更多健康食譜&食物介紹)

https://www.facebook.com/kforkitchenhk

Follow 我的 Instagram https://www.instagram.com/k_for_kitchen/?hl=en

※◎♡※◎♡※◎♡※◎♡※◎♡※◎♡※◎♡※◎♡※◎♡

做個精明零食達人

經常失控狂食零食？

M前點解會容易失控同想食朱古力？

超鍾意食零食嘅Kay平日又會點食零食呢？

想成為精明嘅零食達人，做到識飲識食，可以食餅、食糖、飲咖啡嘆下午茶但又唔會肥？

可以參考以下Kay食零食嘅心得：*\(^o^)/*

1. 食之前先飲水：

同食正餐前一樣，我習慣喺食零食之前先飲一至兩杯水，一來可以打個底；二來有時感到「肚餓」，其實可能係身體缺水嘅訊號。

2. 準備比較健康嘅零食同水果：

乜嘢係比較健康嘅零食呢？原味紫菜、魷魚、馬莎同利口樂等牌子嘅無糖糖果、未經調味嘅開心果、花生同腰果、低卡低糖低脂但又不失美味嘅穀物、能量棒、低脂芝士、馬莎低脂牛奶餅乾、無添加「真糖」嘅乳酪、低卡咖啡同麥包等等。

3. 份量同卡路里：

每次食小食應儘量控制喺150千卡左右。所選嘅食物要以低脂低糖低鹽低卡為目標。

例：一杯低卡咖啡（13千卡）

一杯西瓜或者一個蘋果/橙（70千卡）

八片米餅（65千卡）或

馬莎好味好好味低卡茶餅兩塊（70-80千卡）

 = 150千卡左右！

4. 經常失控狂食零食？是壓力太大嗎？

如果你經常有不自控地狂食零食，咁應該先了解一下，你會否是工作或者生活壓力太大了？其實，做香港人很難沒有壓力吧？如發現因壓力太大、皮質醇偏高、經常易攰、脾氣暴躁而經常想吃甜品、蛋糕、麵包、Pizza等的食物，便應該考慮為了健康着想，找更好的減壓方法。

我會首推我最最喜歡的「負重帶氧運動」-->shopping!!!!!! 哈！買嘢開心又唔會肥嘛！此外，跟三五知己做一點點的運動也對健康好有益處呢！即使係急步行又或者係放下狗仔，運動之後都會釋放安多酚，成個人都會開心啲架！

5. 生理周期影響？

生理周期來到前的兩個星期，飲食方面最容易失控，因為身體會發出要「多吃一點」的訊號，以補充生理周期期間，因要排出經血而所需的額外卡路里。

知道呢個事實之後，以後就可以適量地調節飲食，以應付身體嘅需要啦。

6. 唔買就唔食！

個人經驗分享：Kay當然都會冇啦啦忽然勁想食朱古力或者勁甜嘅蛋糕！！但如果屋企冇嘅話，我絕對唔會換衫化妝落街買！

簡單嚟講，如果屋企長期都係得魷魚、原味紫菜、香噴噴日本低卡米餅、冇乜卡路里嘅咖啡（但又勁勁勁好飲！）、脫脂奶、不同款式嘅新鮮水果等等，想肥都唔容易啦！

祝大家愈食愈瘦！

相片caption：

1. 左上角嚟自荷蘭嘅牛奶：價真棧有得賣$12/3盒。

2. 低脂乳酪穀物棒：購自德國。但係類似嘅穀物棒，喺百佳、一田同奌奌綠都有得賣。我之前都有開相簿介紹過架。

3. Blendy stick: 購自日本。香港：間中喺卓越一生良品/極少部分759都會有。

4. Coffee capsules: 購自759+日本。

5. Yoplait 低脂低卡乳酪(有不同口味)：CitySuper $14@

6. Starbucks Doubleshot Americano: 購自「零食最強」。約$8@。

袪濕去水湯（2-3人份）

夏日炎炎，有冇試過覺得瞓極都唔夠、抵抗力越嚟越差、雙眼浮腫、關節疼痛、全身都超攰咁樣呢？呢啲其實都係典型濕重嘅症狀！想幫身體祛濕、回復genki，可以考慮煲煲呢款冬瓜祛濕湯。

冬瓜，兩個字：利尿去水排毒祛濕清熱解暑！*\(^o^)/* 夏天想食得清淡一啲，除咗青瓜、西瓜同我之前介紹過嘅泰式青木瓜之外，其實仲可以食冬瓜。

材料

木綿花適量

川太片數片

赤小豆1把

扁豆1把

生熟薏米各1両

燈芯花1束

荷葉2片

蓮蓬1個

冬瓜大半斤

做法

1. 將所有材料洗乾淨之後，水滾起計用中小滾半小時左右便OK。

小貼士

1. 可以直接去藥房執一包「祛濕冬瓜料」+ 大半斤冬瓜煲30分鐘。

2. 加豬展同鹽可以變成湯，加片糖就可以當糖水咁飲。

3. 扁豆、赤小豆同生熟薏米都有助去水腫同清熱氣。佢哋嘅性質溫和，同樣有清熱利尿等嘅功效，無論寒底或熱底人士都適合食用。

麻酸辣醃小青瓜（勁香花椒油版本）

麻酸辣醃小青瓜（勁香花椒油版本）

（大家會去書展嘛？Kay 19/7 星期日晏晝1-2點會喺1B－B016 皇冠／青馬文化事業出版社度出現。有時間嚟見個面傾吓計分享瘦身心得吖。）

我超鍾意食麻酸辣等嘅菜式，但係為咗身體健康，我已經絕少會再食大辣米線又或者麻辣火鍋。但咁又唔等如我已完全戒絕辛辣嘅食物喎，我始終都係為食同埋鍾意食辣嘢！呢款加咗花椒油嘅醃小青瓜，少麻帶酸同微辣，係一年四季都超啱食嘅前菜。

青瓜利水低卡等嘅好處應該唔洗我多講嘞，快快買支花椒油整呢道醃小青瓜就知我呢個食譜真係冇得輸。( ´ ▽ ` )ﾉ

材料

小青瓜5條

鹽1-2茶匙

汁料

白米醋4湯匙（我用淘大咋）

生抽2湯匙

糖2湯匙（我習慣用黃糖）

花椒油3茶匙（只有麻香而不會辣）

（乾貨店有售，我喺灣仔成發椰子買$15@）

麻油1茶匙

蒜蓉1-2湯匙

指天椒2隻（不喜可略）

辣椒粉1湯匙（不喜可略）

做法

1. 青瓜皮洗淨，可削去部分表皮令其更易入味。

2. 取一大碗，加入約1湯匙鹽，拌勻並靜待30分鐘。

3. 倒去青瓜的苦水，並用凍滾水沖洗一下，然後再瀝乾。

4. 調較好醬汁。將青瓜和汁拌勻。

5. 放進雪櫃（下格）半小時待入味。

小貼士

1. 想即食的話，將青瓜切得薄一點或用刀背先把青瓜拍一下就OK。

2. 調好汁之後，可先試味並調校至自己最喜歡的酸辣度。鍾意多酸少辣抑或係多酸大辣都可以自己話事。

3. 醬汁內有糖和油，因此儘量不要吃太多。

《與飲食無關 · SAA助養動物計劃》

踏入七月，又到咗我同愛人拍拖週年紀念嘅月份。趁今日71放假，我決定要入元朗白沙村SAA, 送一份有意義嘅禮物俾呢個同我相愛咗17年嘅傻蛋。( ´ ▽ ` )ﾉ

貓咪同狗狗當然唔可以當禮物咁送俾人啦，但終生嘅助養計劃就唔同。有時候，朋友同愛侶間與其勉強送禮，倒不如一齊助養動物又或者入去SAA一齊做下義工吖。(・ω・)ノ

同大家介紹我地今日助養嘅三隻因不同原因均失去了一隻手手嘅狗狗：Leon, 小強 & Mei Ling（由左至右）

助養計劃開始之後，以後每四個月左右都會得到Leon, 小強 & Mei Ling 嘅近照同簡單報告。助養人仲可以不時入去探吓啲狗狗，同佢地傾下計、散下步又或者幫手清潔狗籠等等。

下次要送禮嘅時候，不妨可以考慮吓將心意化成愛，送俾其他有需要嘅小動物啦。◉‿◉

以下係SAA嘅資料：

SAA 保護遺棄動物協會

會址：元朗僑興路白沙村第一段

開放時間：逢星期三、五、六、日及公眾假期下午1時至4時（除團體外，無需預約）

SAA Facebook: https://m.facebook.com/SAA.ORG.HK

低卡甜品：台灣愛文芒涼粉

甜品都有低卡架咩？

有！！否則我唔會減磅成功！因為我太鍾意食嘢嘞！今日介紹呢款甜品，就係屬於低卡清熱食物。由涼粉草煮成嘅涼粉，雖然冇任何嘅甜味，但由於每100克只得少於40千卡，就算日日食一杯都唔怕增磅。

***台灣名產愛文芒***

Kay今日得到鄰居朋友送來的兩個台灣名產——台灣極品芒果愛文芒！名字浪漫的愛文芒的纖維少、肉質細嫩、皮薄、顏色就像蘋果一樣（所以又稱蘋果芒），果肉帶濃香又清甜。

現在正是愛文芒當造的季節。想買來試試看的話，可以到油麻地果欄或到順豐或Groupon之類嘅網站訂購。每個參考價約HK$25+。

***點食涼粉先唔肥***

講返涼粉，要食得健康無負擔，最緊要係唔好狂加高脂又會塞血管嘅淡奶、煉奶或者糖水，因為呢啲都係empty calories~ 其實，除咗無糖糖漿，我哋仲可以加入適量嘅生果，令涼粉即時甜味倍增！

***防癌低卡抗氧化西瓜***

除咗芒果，我哋仲可以拌入含豐富維他命A同C嘅西瓜！西瓜含豐富抗氧化物質，可以保護細胞、消炎同防癌等等。唔好以為西瓜甜甜地就一定好高卡路里，其實好夠飽肚嘅西瓜超過九成都只係水份，每150克西瓜大概只有50千卡架咋。

***其他低卡糖水***

除咗涼粉，去到糖水舖其實仲可以揀含豐富蛋白質、低卡高鈣嘅豆腐花。食嘅時候仲可以加入少少黃糖、無糖糖漿又或者係代糖糖水架。

最後最後，其實喺便利店買到嘅紅豆雪條，每條只有90千卡，都算係唔錯嘅選擇啦。

泰式青木瓜沙律

泰式青木瓜沙律

就嚟打風又熱到飛起可以食啲咩？我會整一大盤少汁但勁fresh又極低卡嘅沙律喺雪櫃，邊日口淡淡冇乜胃口就就咁裝一大碗當飯食！(=^ェ^=)

材料（2-3人用）

青木瓜1個（$25左右）

甘筍半條

泰國金柚 1/4個

熟香芒1/2個（可略）

花生或任何果仁碎2湯匙

炸乾葱片1-2湯匙（裝飾）

沙律汁

青檸汁2.5湯匙

白醋1湯匙

代糖1湯匙或黃糖2湯匙

（也可用1-2湯匙蜜糖代替）

魚露2-2.5湯匙

指天椒碎1/2湯匙

蒜茸1茶匙

做法

1. 青木瓜、甘筍和香芒：先放雪櫃冷藏備用。）

2. 將青檸切半去核榨汁。

3. 將沙律汁料全部拌勻至糖完全溶解。

4. 將青木瓜和甘筍去皮、刨絲。

5. 芒果起肉切條。

6. 將青木瓜絲、甘筍絲、芒果肉和金柚肉拌勻。

7. 倒入沙律汁，放入雪櫃冷藏約1小時。

8. 撒上炸乾蔥片和花生或果仁碎即可。

小貼士

1. 必須用鮮榨的青檸汁。不要買現成膠樽裝那些，因為味道始終沒有新鮮的好。（我中過招⋯⋯）^_^

2. 喜歡的話，加上雞絲伴吃又是營養均衡的一餐。

3. 醬汁內有糖和魚露，因此儘量不要吃太多。

4. 大部分材料於各大街市內的泰國雜貨店有售。此外，亦可到九龍城街市或灣仔街市對開近電車路附近的泰國食品店購買材料。