K for Kitchen 瘦身廚房: 【結婚12周年禮物

話說愛人Mr Funny真係好鍾意食蘿蔔糕，所以我又做咗另一個蘿蔔糕食譜啦(2017版)（佢瘋狂到一個地步係，當我話要送啲蘿蔔糕比鄰居同朋友，佢反問我咁做有冇覺得對佢「不忠」！╮(╯▽╰)╭ 咁好啦，我唯有等睇佢每朝都用蘿蔔糕做早餐直到年初十啦！哈！）

今年有廚師機幫手，切2斤幾蘿蔔只需要1分鐘。從此以後，乜糕物糕放馬過嚟啦 (￣∇￣）

不過，點解我又要做另一個蘿蔔糕食譜呢？因為之前睇報紙見到 周中師傅 點評蘿蔔糕，佢話食蘿蔔糕最緊要有 蘿~ 蔔~ 味~ 師傅又講得啱喎！加上我今年唔想食豬肉，所以就做咗以下呢個新食譜。

效果絕對可以媲美有臘腸、臘肉嘅蘿蔔糕。鍾意食臘味嘅朋友，照樣可以用下面嘅食譜，加返兩條臘腸同少少臘肉，再減少少蠔油就冇問題。

雖然話周街都有蘿蔔糕賣，但自己用心整嘅無論係品質同味道都一定係最好！$200細細舊機做嘅工廠蘿蔔糕，點都比唔上親手做嘅咁有溫度。好啦，食譜嚟嘞~！

【材料 (可做 6吋圓形錫紙模 4底)】

白蘿蔔粗+幼條（見圖）2300克 (刨絲後重量)

乾瑤柱適量 (我用咗 80克左右)

蝦米適量 (我用咗 1/3碗左右)

乾冬菇（大）10-12隻
淡口菜甫 2湯匙

乾蔥 1大粒 (切絲)

油 1-2湯匙

【粉漿】

粘米粉 290克

鷹栗粉 10克

浸海味水 150-250毫升

（視乎煮好蘿蔔的出水量而加減）

【調味料】

麻油1湯匙

糖 1湯匙

蠔油 3湯匙

菇粉/雞粉/鮮味粉* 1湯匙

鹽少許

胡椒粉適量 (強烈推薦「手標牌」)

當日機切的大小，口感好適中。

【做法】

冬菇、蝦米和瑤柱沖乾淨再浸過夜。之後全部切粒。留起約150-250毫升的瑤柱/蝦米水備用。
蘿蔔去皮洗淨刨成粗及幼條。(不要切/刨得太幼否則會無口感。)
菜甫洗淨切蓉。(不喜可略)
平底鑊中加1湯匙油及乾蔥絲。
炒香蘿蔔以外的所有材料。（可留起約¼的冬菇、蝦米和瑤柱做裝飾）
盛起已炒香的配料備用。
煮蘿蔔約10分鐘直至蘿蔔軟身出水。（可加蓋焗至大滾並冒出水蒸氣）
加入全部調味料及已炒香的配料並關火。
從鑊中倒出煮蘿蔔出的水於一大盆中並倒進粘米粉混合成粉漿。
把混合好的粉漿倒進鑊中並快炒至兩者完全混合。（可視乎情況加適量備用的浸海味水。）（我比較喜歡傳統「炒粉」的做法，因可視乎蘿蔔煮起後的出水量而調整水份，成功機會大大提升。）
可試試成品味道是否足夠，否則可再加調味料。最後，加一湯匙麻油令蘿蔔糕更滑口。
把蘿蔔糊倒進容器中。有需要的話，可以先蓋微波爐保鮮紙或錫紙以免令糕面被蒸氣弄到水汪汪。
以中大火蒸50-60分鐘即可。（視乎糕的厚度而定）
喜歡的話，可以加入炒香了的白芝麻及蔥或芫荽等配料。