南瓜亞麻籽杯子蛋糕

我承認，我以前一直都誤會了南瓜！因為南瓜不單高纖、不易致胖，還含豐富營養、膳食纖纖和胡蘿蔔素，可以幫助我們抗氧化和令腸道更健康！適量食用還可以令皮膚靚靚。一杯重50克的香甜南瓜，更加只有35千卡，乃是做蛋糕或中式糖水的上佳之選。

另一方面，亞麻籽含奧米加三脂肪酸，有助維持心血管和消化系統的健康，而且還能夠加快身體脂肪燃燒的速度。除了用來做蛋糕，磨碎了的亞麻籽，還可以加入果汁、沙律或麵包麵糰中。

以下為超簡易的杯子蛋糕做法，無需打蛋器或其他用具，只需要將所有材料拌勻即可入爐。用植物油代替牛油，不單更健康，器具清洗亦極容易，非常適合我這種懶人。

材料（9中杯）

熟南瓜蓉150克

植物油（任何） 80毫升

低筋麵粉200克

糖80克

鹽1/16茶匙

（無鋁）泡打粉2茶匙

大蛋兩隻（約100克）

牛奶或無糖豆漿80毫升

亞麻籽2湯匙

做法

1. 焗爐預熱至180度。
2. 先將南瓜蒸熟，壓成蓉備用。
3. 將亞麻籽磨碎。
4. 將植物油、糖、鹽和雞蛋拌勻。
5. 加入已過篩的粉類。
6. 加入南瓜蓉、豆漿和亞麻籽拌勻。
7. 將麵糊倒入容器中。
8. 焗25分鐘即成。

小貼士

1. 南瓜壓成蓉之後可能會有少量出水，可倒去多餘的水分以免麵糊太濕。
2. 如喜歡香濃的口感，可用冷卻了的牛油溶液（約70克），代替食譜內的植物油。
3. 不喜歡加入亞麻籽的話，可以同等份量的藜麥代替。
4. ※◎♡※◎♡※◎♡※◎♡※◎♡※◎♡※◎♡※◎♡※◎♡
   《K for Kitchen 瘦身廚房》
   加入K for Kitchen 瘦身雜貨店 (已開業)
   http://www.kforkitchenhk.com/
   《K for Kitchen 瘦身廚房》 部落格 / Blog
   http://kforkitchen.blogspot.hk/
   我的兩本著作：《愈食愈瘦》《愈食愈瘦 2》
   http://www.cp1897.com.hk/product_info.php?BookId=9789888276776
   Facebook 專頁 (睇更多健康食譜&食物介紹)
   https://www.facebook.com/kforkitchenhk
   Follow 我的 Instagram https://www.instagram.com/k_for_kitchen/?hl=en
   
   
   ※◎♡※◎♡※◎♡※◎♡※◎♡※◎♡※◎♡※◎♡※◎♡

【Kay第一次收到贊助之 ● Meyer美亞CIRCULON朱古力圈圈鍋】

謝謝美亞送我的新鍋具，耶耶耶！

我嘅煮婦魂又被燃燒到七樓咁高嘞！有冇人同我一樣，收到廚房用品會開心到癲咗？

Anyway, Meyer呢個朱古力圈圈鍋，標榜嘅係底部高低坑紋圈圈嘅專利設計，想搵隻萬用健康易洗嘅鍋，呢隻的確係不二之選！

我用呢個鍋煮咗無油煎蛋、低脂宮保雞件同炒雜錦（素）等等。用咗一段時間，我想講：😽「我想搵隻呢啲易用嘅健康鍋好耐嘞！！」

喺未詳細介紹個鍋之前，先同大家分享宮保雞件個食譜先吖。

低脂宮保雞件（3-4人份）

宮保雞丁屬於多油重味嘅菜式。但今次嘅做法，完全不用油炸，靠呢個鍋嘅專利凹凸紋設計，先將低脂嘅雞件煎香，再靠花椒油同其他調味料，做出酸酸甜甜輕麻醒胃嘅效果。

材料
急凍雞髀3隻（請凍肉店切件）
（雞上髀去皮：屬非常低脂部分、香滑又好味！）
乾辣椒適量（唔辣，取其色澤）
薑5片
乾蔥3粒
蒜頭3瓣
蔥段適量
花生/腰果適量

醃料
豉油1.5湯匙
麻油1茶匙
胡椒粉適量
生粉適量
糖1茶匙
水2-3湯匙
（打水令雞肉更香滑）

醬汁
生抽1湯匙
糖1湯匙
烏醋1湯匙
酒1茶匙
花椒油1-2茶匙（取其麻香，不喜可略）
（如果冇花椒油，用一湯匙花椒代替亦可。）

做法
1. 用一至兩茶匙油起鑊，爆香乾辣椒、薑片、乾蔥和蒜頭。
2. 加入雞件，用中大火兩面各煎三分鐘。
3. 加一湯匙水，上蓋焗至雞件九成熟。
4. 加入醬汁煮一至兩分鐘。
5. 最後，加入蔥段和花生即可。

有關美亞呢個朱古力圈圈鍋：
*獨特的底部高低坑紋圈圈專利設計，有效減少油脂攝入；
*高低坑紋可減少油脂吸附在食物上，煎完食物之後的油脂，會流向凹槽，變相又食少啲脂肪；
*煎/煮完嘢之後，可直接上枱，清洗也極容易。
*11月30日前，喺美亞觀塘旗艦店、各大百貨公司及超市專櫃購買CIRCULON朱古力圈圈鍋系列，都有七折優惠。（適用於任何爐具）
(我用呢款30.5cm 未折前係$1099)

低卡雜錦小炒（素食）

***食少啲肉，唔單止會對地球好啲；食多啲纖維仲可以幫我地吸走多餘嘅脂肪排出體外架。所以，記得每日都要儘量吸收足夠嘅纖維啊！

我以前係食肉獸，宜家為身體為地球同動物，有時都會間中食吓齋。今次呢味餸好味都暈，屬於第二日帶飯都仲咁好食嘅類別！呢輪又同同事夾份訂返曉峰有機菜，試咗包我好憎食嘅荷蘭豆⋯⋯ 嘩！好好味呀～～～～～（味吉洋一tone）（年紀大，口味原來真係會改變架！荷蘭豆宜家做咗我最新嘅best friend~!）

而秋天呢其實係品嚐蓮藕嘅最佳時節。(講起秋天，好耐冇見，唔知佢去左邊，今日真係好熱哦~!) 蓮藕飽肚，有膳食纖維同丹寧酸等等，可以幫我地抗氧化同促進胃腸蠕動。木耳嘅益處就更加唔洗我多講啦~~ 希望大家諗帶飯帶咩餸好嘅時候，考慮下食多D飽肚嘅菜啦。

材料

年藕1段（手心大）

貓耳朵或普通木耳1把

荷蘭豆1碗

紅蘿蔔1舊（手心大）

粟米芯8-10條

薑、乾蔥適量

調味料

油1湯匙

蠔油2-3湯匙

味醂或酒1湯匙

麻油少許（可略）

做法

1. 貓耳朵洗淨浸軟。
2. 年藕和紅蘿蔔切極薄片。
3. 荷蘭豆和粟米芯洗淨備用。
4. 用一湯匙油起鑊。
5. 爆香薑和乾蔥。
6. 先放蓮藕貓、耳朵和紅蘿蔔炒一炒。
7. 加入少許清水再上蓋，以中火煮五分鐘至八成熟。
8. 加入蠔油、味醂、荷蘭豆及粟米芯。
9. 再上蓋煮約三分鐘。
10. 待所有材料熟透之後，加入少許麻油即可上碟。

小貼士

1. 糖尿病患者同容易胃氣脹嘅朋友請限量進食年藕。

2. 年藕係澱粉類，該餐可考慮減飯。

3. 如果唔切薄片，就請酌量增加烹調嘅時間。

無油濃香蛋餅

我好鍾意食蛋😁

水煮蛋🍳太陽蛋🍳炒滑蛋🍳蒸水蛋

通通都鍾意食

貪佢熱量低又營養豐富

但如果整蛋角

又怕要落好多油煎先好味

上個禮拜發現俾我打咗入冷宮嘅氣炸鍋

（用焗爐都得）

可以一滴油都唔使用

十分鐘內就煮到一味餸

真心易到⋯⋯有啲感動

嗰吓即刻令我嘅煮婦魂再次燃燒‼️

星期六日搵機會整吓呢個【無油濃香蛋餅】吖

【材料】🍴

我今次用咗極瘦嘅「佳之選加拿大式牌煙肉片」（似瘦火腿咁，之前有介紹過。營養師都推薦，兩塊等於一份肉。）

如果想再均衡一啲

仲可以加埋三色椒、菠菜

又或者係甘筍幼粒

有quota嘅朋友

不妨可以加少少牛奶🍼

令到成個菜口感更加豐富同滑溜

落幾多隻蛋就要睇你quota嘞

一隻大蛋一份肉

唔食黃就兩隻蛋白一份肉

自己換算就唔怕食大咗啦

【做法】（二人份）

四隻蛋+兩小片火腿切絲（共5份肉）+黑椒少許

打勻之後

加入已預熱至180度嘅氣炸鍋/焗爐內

焗約6-8分鐘便OK

視乎你要食幾熟啦

配碟菜+五穀飯或其他高纖飯/主食就又一餐囉

【小貼士】

我唔會落鹽調味

因為瘦煙肉已經有味

寧願真係淡到食唔落先後加啦

咁樣會健康 +容易控制啲

【關於膽固醇】

最新研究顯示，過量攝取飽和脂肪，才會令血液中的膽固醇上升；而雞蛋和海鮮中的膳食膽固醇，則對血液中的膽固醇影響不大。如果要有效控制體內膽固醇，最好是減少食用飽和及反式脂肪。（即肥肉及動物油脂等）

【韓星減肥法@飲食男女】

韓國女星個個都樣靚身材正

佢地嘅減磅秘密係咩呢

成效又如何呢？想知？

快啲睇吓我喺《飲食男女》嘅第三個video啦

多謝各位click click / like like 支持呀

Thank you thank you all  *\(^o^)/*

P.S: 我真心係水腫王，導演都話我塊面嗰日比平時明顯肥咗 (´･_･`) 好在今日已經回復正常。

http://etw.nextmedia.com/etw/videoWallDetail.html?id=3908

減肥都可以食海鮮

【深夜放毒系列】

減肥都可以食海鮮/食好啲

其實好多海鮮嘅蛋白質豐富

有啲朋友可能會誤會咗

以為鮮魷同生蠔係膽固醇好高嘅食物

只要唔好食內臟同埋蟹膏

就唔需要太擔心膽固醇嘅問題

好多膽固醇其實唔係食返嚟㗎

今晚我用咗少少清湯煮辣酒東風螺

仲有清蒸貴花蚌

底層放咗粉絲/芋絲墊底

佢哋吸曬所有精華

食起嚟清清甜甜

見到愛人滿足嘅笑容

更辛苦都值得

最後就係奄仔蟹花雕蒸蛋白

雖然蛋白蒸得唔算好靚

但總算好滑溜

愛人見到咁多蟹膏

笑到見牙唔見眼

Myth or Science

明珠台

Myth or Science 節目

（第2-3集精華）

近排睇咗逢星期四930喺明珠台播嘅呢個節目，好好睇！我撮寫咗當中有趣嘅部分俾大家參考。有興趣可上Mytv網上重溫。（現只剩第三集可重溫，要睇就要快手嘞）

1. 關於餐具同食量

食淺色嘅嘢（如：飯）用深色嘅細碗/碟

食深色嘅嘢（如：牛扒）用淺色嘅細碗/碟

用細啲嘅碟！我地會因為視覺上嘅誤差而食少咗！

唔好睇少呢個差異，如每日只係食少100千卡，足以令人一年輕10.4磅！

2. 咖啡因可以提升記憶力！

咖啡唔會令身體缺水

但咖啡唔係人人都啱飲

要睇有冇某隻酵素

如果冇，可選擇一日一杯或者飲decaffine 

3. 關於運動：

1小時嘅室外帶氧運動會令身體流失3.5公升嘅水分，運動完記得補水。

*****做運動會令膚質變好！*****

我絕對要再努力啲呀，因為呢排發現開始有較明顯嘅皺紋！

4. 肥就一定冇咁fit?? 

BMI高+內臟脂肪多啲都可以好fit?? 

原來呢啲朋友唔一定比BMI正常+較少脂肪組織嘅人身體差啲！佢地嘅運動表現可以較好+

患某啲病嘅機會反而會低啲啲。

（個人認為，（內臟）脂肪都係「寧缺勿濫」啦）

5. 血型減肥法有冇用呢？--》冇！

6. 海鹽、猶太鹽係唔係真係比餐桌鹽健康？--》NO! 佢哋含嘅鈉都係一樣，多食始終影響健康。

7. 黃糖、蜜糖以及龍舌蘭糖漿係唔係比白砂糖健康？--》NO. 糖就係糖，本質一樣都係高熱量低營養嘅食物。（原糖raw sugar據稱會好啲~~）

*雖然節目內部分嘅實驗方法可能未係好完美，但大部分都有比較大型嘅研究支持，所以都值得參考。

微卡晚餐！

去旅行又或者係外食食多咗，往後想調整嘅話，最好就係放工早啲返屋企，食一個微卡晚餐，將之前增加咗嘅體重一一減返返嚟！

同大家分享一個我間中都會食嘅微卡晚餐吖：

材料

鏗魚高湯/昆布高湯/清水加鹽/雞湯適量

冬菇或冬菇片適量

紹菜/椰菜適量

芋絲1盒

瘦肉碎3湯匙

（除肉碎外，其他材料都寫「適量」，因為都是微卡啦，可以放心吃到飽！YEAH！）

做法

1. 瘦肉碎（請選超瘦肉）可直接烹調，也可以用少許的豉油、糖和生粉先調味。冬菇洗淨浸軟。

2. 用1-2茶匙油、薑和蒜（可略）起鑊。

3. 先炒熟肉碎。

4. 加入所有蔬菜、菇片和高湯以中火煮約十分鐘。

5. 上碟前3分鐘，加入芋絲煮熟即可。

小貼士

1. 這個微卡晚餐，當午餐一樣可以。

2. 胃部較弱嘅朋友要適量進食，因為芋絲比較難消化。

3. 部分芋絲可能會有少許「味道」，可用滾水沖洗一下，加上高湯即可癖味。

傳統月餅 vs 冰皮月餅 vs 低糖月餅

減肥遇上中秋節應該點算好？過時過節當然要食啲應節食品，但點先可以食得健康啲呢？屋企已經有好多月餅，點先可以減少誘惑又可以造福社會呢？

月餅嘅款式愈來愈多，我尋日就喺SOGO見到「六黃白蓮蓉」！！當然唔少得近年好流行、一餅難求嘅「美心流心月餅」啦。除此之外，市面上仲有傳統嘅雙黃白蓮蓉、五仁月餅、奶黃月餅、黑松露月餅同埋其他用生果作為餡料嘅冰皮月餅等等。

傳統月餅一般係由豬油、糖同埋蓮蓉製成；但近年大家嘅健康意識提高咗，好多月餅都改用植物油嚟製造。但要留意返，佢哋嘅總脂肪同卡路里其實係冇減少到㗎。（1毫升油=9千卡）

傳統月餅每100克有超過20克嘅脂肪（1.3湯匙）同近50克嘅糖（12.5茶匙）！而冰皮月餅其實都不遑多讓，每件嘅size細啲，但每100克嘅糖分亦有接近50克！絕對係屬於高糖嘅食品。

圖片來源：明報新聞網

¼個傳統月餅 vs 1個冰皮月餅

但當然，好少人會每日食一個月餅，所以又唔需要太過擔心。^_^ 咁如果每次只係食¼個傳統月餅（約46克），又有幾多卡路里呢？

¼個傳統月餅（46克），大概就有：

約200千卡（即約1碗飯）

2茶匙嘅脂肪

5.8茶匙嘅糖

咁一個迷你冰皮月餅（55克）又點呢？

（比較時要留意重量比傳統月餅重20%左右）

約183-200千卡（都係約1碗飯）

1.7茶匙嘅脂肪（平均幾隻味嘅數值）

3-4茶匙嘅糖

冰皮月餅之中，奶黃同以榴槤作餡嘅冰皮月餅會比較高卡。美X嘅冰皮月餅一般會比X班低卡低油。而其他牌子（如聖X娜）嘅冰皮月餅，就同美X所含嘅卡路里差唔多。

所以話呢，冰皮月餅嘅油同糖始終較傳統月餅低啲啲。個人認為，食月餅最緊要係揀一啲不含反式脂肪、低飽和脂肪同埋低糖嘅款式。當然，如果想少食多滋味，食迷你冰皮會比較好控制。

低糖月餅嘅選擇

低糖月餅同傳統月餅嘅卡路里睇起嚟分別唔係太大，但係低糖月餅採用嘅糖GI值比較低，對糖尿病又或者一般關注健康嘅人士都有好處。此外，唔講唔知，低糖月餅所採用嘅麥芽糖醇，人體只會吸收一半，另外一半會自然排出。咁即係話，食100克嘅糖，我哋實際吸收只有50克咋！想搵低糖嘅月餅，可以去美心、榮華、奇華同埋鴻星睇睇。

美心 http://maximsmooncake.com.hk/product/set1.html

榮華 http://www.wingwah.com/tch/products/default.aspx?c=120390

奇華 http://keewah.com/hk/products/mooncake

鴻星 http://www.superstargroup.com.hk/news_detail.php?id=86

食月餅小貼士

1. 食傳統月餅嘅話，女士每次食¼個就已經係上限，如果食冰皮，可以兩個人分享一個吖。

2. 月餅食多咗嘅話，可以選擇減少正餐嘅飯量。例如晏晝食咗半個傳統月餅嘅話，夜晚可以食少碗飯。（但唔可以將cut飯+食snacks當成一個習慣）

3. 如果你好幸福，屋企有好多自己買或者係人哋送嘅月餅；Kay建議大家，可以考慮送俾街上嘅拾荒公公同婆婆 / 朝早喺地鐵收報紙嘅老人。Kay覺得咁樣嘅中秋會更有意義。如果你有好多月餅打算捐出，請考慮捐俾救世軍或其他社福機構。

救世軍「心好月圓」中秋行動

尚欠三千個月餅　請即捐餅支持

http://www.salvationarmy.org.hk/media_centre/media_detail/3/70

其他接受月餅捐贈嘅機構名單(2014)

http://www.foodwisehk.gov.hk/pdf/Mooncake_Donation_List_2014_cn.pdf

***歡迎大家提供更多機構名單***

捐贈月餅時須注意：

1. 未必需要整盒捐贈，獨立包裝(單個裝)的也可以。

2. 檢查是否未過食用日期。

3. 一般不會接受冰皮月餅或雪糕月餅的捐贈。

4. 如果有低糖月餅，可特別註明給長者。

關於牛奶：全脂、低脂定係脫脂好？

關於牛奶：全脂、低脂定係脫脂好？

好有心機寫嘅一篇長文，完全冇圖，希望大家唔會嫌悶兼多多支持我。話說香港人都比較冷漠，連我啲朋友都好少再關心我喺個blog度寫啲乜( ´ ▽ ` )ﾉ哈！

關於牛奶，爭議真係從來都無停過— 「牛奶會致癌」、「脫脂奶加入了許多糖，反而會令人愈飲愈肥」、「全脂奶比較有益和少添加劑，脂肪高一點不是問題」等等。

由於我都曾經有好多疑問，不如將我所知嘅，同大家分享吖。（歡迎一齊研究討論）

Q1: 我飲全脂、低脂定脫脂奶好呢？

答：可以考慮吓自己需要啲咩先：你嘅體脂會唔會過高？膽固醇又有冇超標？需唔需要補充額外鈣質呢？

Q2: 脫脂或低脂奶係咪一定會比較高糖同多添加物？

答：的確，脫脂食物有時會為了口感而加入糖；但個人認為，只需要小心看營養標籤，便不難找到真正低脂低糖和低卡的選擇。

Q3: 聽講脫脂奶同其他低脂低卡食物一樣會愈飲/食愈肥，係咪真架？

答：一般嚟講，好多低脂低糖食物並·不·會·愈·食·愈·肥·啦。

相信係有部分人會誤會咗，有「脫脂喎，實唔會咁易肥啦」呢個錯覺，而會比飲全脂奶仲飲得多咗 / 食多咗。

我覺得控制分量最重要，無論幾有益或較低卡嘅食物，都唔應該吸收身體所需以外嘅份量。否則結果都係只得一個啦啦啦⋯⋯

（亦適用於其他脫脂或無糖飲品及食物）

*喺牛奶同乳酪嘅營養標籤上面見到有糖唔洗驚，因為佢地本身係有一定嘅糖份㗎。因此，有時都要了解一下食物本身嘅特質，唔係話有糖就一定唔好，又或者係額外添加物。

Q4: 牛奶係咪會致癌？

答：直到今日，都冇證據顯示牛奶會致癌。

高脂飲食、少運動同食煙飲酒反而更影響健康。

Q5: 新鮮牛奶定存放期較長嘅牛奶好啲？

兩者嘅營養價值相約。

Q6: 人係咪一定要飲牛奶？敏感唔飲得或者唔鍾意飲嘅話，食咩補充返啲鈣質好呢？

唔飲牛奶當然得啦。無單一嘅食物係必定要食嘅，況且牛奶裡面嘅鈣質都唔係最高＋我哋都吸收唔晒㗎。想補鈣其實仲可以食小魚乾（高鈣！）、黑芝麻（煮豆腐啱晒）、豆腐（新鮮＋硬身啲嗰隻會高鈣啲）、芥菜同芝士等等。

Q7: : 有邊啲牌子成份比較天然同少添加劑？

我平時會選擇一啲存放其較長、經UHT高溫消毒的牛奶，嚟自日本、澳洲又或者紐西蘭等，禁用雌激素嘅國家生產嘅低脂/脫脂奶。事實上，進口嘅低/脫脂奶都可以好健康、無添加同營養豐富㗎。

Q8: 前排睇報紙見到有位營養師大力推薦全脂奶並指脫脂同低脂奶其實冇益；但事實上亦有好多營養師話（尤其想減磅）成年人應該飲脫脂或低脂奶，咁其實我應該點做呢？

對同一種嘅食物，唔同營養師有唔同嘅切入點，有時候都要靠自己多聽多睇多學，去分析返乜嘢先係最適合自己。

題外話：

食物比我地想像中複雜好多。即使係西瓜同香蕉呢啲咁「天然」嘅食物，經過咁多年嚟嘅「發展」同演變，拆開咗原來都有唔少「化學物質」同經過基因改造。因此，唔係話成分表有少少化學物質就一定係壞嘅食物，反之亦然（咁當然愈天然就愈好啦），但其實攝取嘅份量先至係最關鍵。

有興趣可以click個video睇吓。

食物當中添加嘅穩定劑同其他添加劑⋯⋯

天然食物都唔一定係絕對健康

（請睇片，都幾發人深省）

https://www.youtube.com/watch?v=bkhhCi7nMFI

http://asapscience.com/videos/natural
(Dosage is toxic)