愈食愈瘦●水餃篇(CJ Bibigo)

你鍾意食水餃同湯麵嘛? 我好鍾意架! 不過之前見營養師果時，佢地話市面上果D水餃九成九都又鹹又肥(仲會用豬油添呀!!)，所以叫我唔好食 >.<，直到呢隻餃子嘅出現。

呢隻韓國CJ Bibigo嘅雞肉水餃，味道OK，最緊要唔好煮太耐，水滾3分鐘就食得。如果你有跟開營養師，呢隻水餃嘅換算方式係每9粒等如1穀1肉1脂肪。係咪好易記呢？下次經開惠康 / 百佳 / 一田，都可以考慮呢款低脂低鈉水餃啊。(網友話新嘅蝦味暫時只係喺一田有得賣~)

低脂好味又唔鹹。

 新嘢~!!!!!  新嘢~!!!!!  新嘢~!!!!!  新嘢~!!!!!  新嘢~!!!!! ^_________^ 尋晚(10/9)例行「巡邏」一田超市果時，竟然俾我發現呢隻比雞肉水餃更健康嘅鮮蝦水餃!!! 第日又多一個選擇啦~

P.S: 我今日煮咗嚟試吓，個人認為絕對係咁多隻味當中最好味嘅，仲有少少似蝦餃添！(成分主要係蝦、椰菜、竹筍、洋蔥、魷魚同豆腐等等。)

其他味道會比較肥少少~~

愈食愈瘦•零卡/低卡啫喱

九月天氣都仲係咁熱，不如等我同大家介紹一款「低卡唧唧啫喱」，同另外兩款「零卡小粒裝啫喱」啦。

第一張相嗰隻係日本出嘅「低卡唧唧啫喱」，由32卡路里一包起。味道方面就係一貫日本零食嘅質素，我就覺得幾好食。缺點係比較貴同只係見過一田有得賣。(歡迎各位資料補充。)

第二張相嗰隻係另外兩款「零卡小粒裝啫喱」。比第一款更方便，但就冇咁環保。由於佢Size細細，比較容易控制份量，相對就更適合減磅中嘅朋友嘞。

左邊：18大粒

右邊：42小粒

(價錢見相中price tags)

長氣講多句，零食都係淺嘗就好。千祈唔好日日食或者一次過食太多呀。^.^

用LC鑄鐵鍋煮嘢食真係會好味D?? (蒸雜菜&蒸蟹)

上個星期日放學之後，我見剛開學唔係太多嘢做，就即刻飛咗去學校附近嘅LC專門店度敗家！好多朋友叫我等開倉先出手，不過我驚到時可能會冇呢啲貨色呀(藉口?! ^^)；加上我係一個極心急嘅人，所以都決定今日買住少少Stoneware至止住渴先。>v<

好多人都會好似我一樣有一個疑問—「用鑄鐵鍋煮嘢食，係咪真係會好味D架呢？」

其實LC白色琺瑯款嘅鍋，真係好適合做燉肉、滷水同埋慢燉等等嘅菜式，因為佢最能夠保持食物嘅原汁原味，而且可以連鍋上桌，的確非常靚仔！仲可以洗少一隻碟添！(不過D鍋真係重，我有時邊煮邊舉當做咗gym, 順便修吓手臂D線條! >.<)

咁我平時又會點樣用白色琺瑯嘅鑄鐵鍋呢？除咗炆、燉嘅菜式之外，我最常做嘅就係蒸雜菜！用呢種鑄鐵鍋嚟蒸食物，基本上可以唔使點加水直接蒸就OK。平時我會加少少油、鹽/蒜蓉/香草一齊蒸。只需要十分鐘，所有嘅雜菜都會又香又甜，而食物嘅水份亦都保存得非常之好！可以話係一試難忘！同普通隔水蒸嘅效果真係差好~~~~~~~~~~~~遠！:-P

蒸好嘅食物依然冇變色。

我而家連蒸蟹都會用LC!!

如果用一般嘅蒸法，可能會令蟹肉變得比較'un'~ 如果用LC，咁大隻蟹(約斤半)就蒸8分鐘，再焗3分鐘就食得！用咗呢個方法之後，每次蒸好嘅海鮮都總係好鮮美同嫩滑架！！

至於黑色嘅鑄鐵鍋就好適合大火快炒嘅菜式，鍾意食香口食物嘅朋友就要留意啦。其實鑄鐵鍋傳熱快，又夠保溫，冬天真係特別啱用！我就用過黑色鑄鐵鍋做過韓式泡菜燒餅同烤肉同菇菇。

最後，LC又colourful又靚嘅外表當然就係吸引我嘅原因之一啦~ 不過如果唔實用，幾靚都係冇用~~ 煮食最緊要開心，我諗我好可能會將成個廚房轉晒用LC~~ 希望9月真係會開倉，而我又可以搵到心水啦~ ^v^ 否則就日•本•見•嘞！

呢三星期以來嘅收穫。

尋日（7/9）敗嘅stoneware~~

頭兩次嘅收穫。

星期四的奇遇 (4/9) - LC & Nespresso

上星期四是Kay's奇遇日。

話說愛人Adrian想去太古城睇相展，我見唔係太忙就諗住陪佢一齊去行吓。點知......

無錯！我又去咗LC!! 今次係去中環總壇！不過呢個都唔係重點，重點係當我地入到鋪頭唔夠十秒，就有一位熱情誠懇嘅店員走上前，問我係唔係K For Kitchen嗰個Kay!! 開咗個Page五個月，第一次有人認得我。嗰一刻個感覺真係好特別，因為我咁細粒、個樣又平凡，冇諗過會有人認到我。C小姐：多謝你成日咁支持我同埋咁留意我個Page呀！真係好感動。（可惜C小姐想保持低調，我地最終都冇合照。)

上去總壇係因為我之前有d使用上嘅問題，但係店員們真係好熱心，我嘅問題都即時一一得到解決！好感謝有關staff的幫忙啦。:-P

買咁多次LC都冇心去上吓d cooking class~~ 我真係比較懶...... >v<

尋日(7/9)買咗花花碟同兩隻飯碗~

仲買咗左邊嗰set花花小兜兜(5隻)~

奇遇之後，我落咗去IFC嘅Nespresso, 諗住補下貨，順便享受下佢最近做緊嘅一個火熱優惠---> 只需要買8條capsules (by email invitation), 就會有一套cappuccino cup set送！(如果冇email invitation, 就買12條都有得送~!) 天呀！須知道Nespresso d杯杯全部都超靚但又唔算平，買少少嘢就有得送就梗係要去睇睇啦。:-P 敗家mode啟動!!

買咗sleeves of capsules 之後，就去嘆返杯latte先~
我今次就買咗......
1) 上年喺羅馬都買過嘅caramel + choco + vanilla capsules~ 當時係新口味+set裝，之後就可以分開買。呢三隻味比較小朋友/適合女士，因為三個都香香甜甜咁好討喜。
2) 新嘅Cubania set + 專用糖~
3) 另外幾隻我飲開嘅flavours~

Nespresso嘅咖啡，每一粒都不含卡路里！最啱我朝早加脫脂奶同少少代糖飲！抵飲過+好飲過Starbucks果d啦~ ^^"

P.S: 關於Nespresso嘅服務，其實我有好多「意見」...... 不過算啦，我下次會用返個app訂咖啡就算。>.<

三低便當系列 (3) -- 南瓜芝士波 配 皮蛋凍豆腐

今次Kay想為大家介紹一個極速lunch box！唔連蒸南瓜，呢個便當嘅預備時間只需十分鐘。行過超市可以買定一兩盒凍豆腐同一兩隻皮蛋看門口，返工要食得健康就無難度啦。

至於南瓜，佢屬於低熱量嘅食物，一杯南瓜粒粒只有25卡路里。而佢豐富嘅膳食纖維，仲可以幫減磅人士增加飽肚感，食咗南瓜會無咁容易覺得肚餓，想食其他野架。：）

順帶一提，Kay每次介紹嘅便當，卡路里都唔會過500卡。只要配合均衡飲食同適量的運動，減磅就再唔係難事嘞。

南瓜芝士波

材料

南瓜蓉1碗

低脂芝士1/2片

芝麻少許

做法

1. 蒸熟南瓜。

2. 趁南瓜溫熱時加入芝士。

3. 壓成蓉後再搓成球狀。

4. 撒上芝麻裝飾。

小貼士

1. 由於芝士已有鹹味，所以不宜再加其他調味料。

2. 如不介意使用微波爐，也可選擇叮熟南瓜。

3. 如不喜歡吃南瓜，可用番薯或薯仔代替。

另外，凍豆腐不單可提供優質蛋白質，每100克更只有50卡路里，可以話係既飽肚，又低卡嘅選擇。

凍豆腐

材料

即食豆腐1小件

皮蛋1/3隻

乾蔥少許

台式油膏/蠔油1-2茶匙

做法

1. 豆腐和皮蛋切片。

2. 淋上台式油膏/蠔油及乾蔥即成。

做法係咪超簡單呢？中秋過後，星期三返工如果想食得清D少鹽D, 都可以考慮下呢個便當架。

Kay祝大家中秋勁快樂! :-D

P.S: 紅米飯不單高纖，還含較低的GI值(升糖指數)，可有效維持飽肚的感覺。紅米的維他命B、鐵質、纖維含量都較白米高，可有效刺激腸道和預防腸癌，膽固醇高的人士亦適合食用。
紅米飯做法: http://kforkitchen.blogspot.hk/2014/08/1.html

P.P.S: 回應部分朋友提問:  食物安全中心: 建議一名成年人每天應進食少於300毫克膳食膽固醇（遠低於飽和脂肪攝入量）。而由於每隻皮蛋含608毫克膳食膽固醇~ 所以每日有quota可以食半隻~ ^^ (但由於我地唔會 (亦唔好) 日日食，所以應該問題不大。^v^)
http://www.cfs.gov.hk/tc_chi/nutrient/fc-myreportc.php

三低便當系列 (2) -- 低脂白汁素通粉 配 醃青瓜

再來《三低便當系列》！

Kay應承過大家會着手預備一系列好味嘅《三低便當》(低脂低鹽低鈉)，方便大家無論何時何地都可以輕鬆享瘦。今次介紹嘅呢個便當，一如以往，做法同用料都非常簡單。好啱忙到飛起嘅OL。：）

順帶一提，Kay每次介紹嘅便當，卡路里都唔會過500卡。只要配合均衡飲食同適量的運動，減磅就再唔係難事嘞。

講返個便當，今次係煮通粉/意粉！邊個話減肥唔可以食白汁意粉呢？今次Kay就用咗脫脂奶同埋低脂低鹽芝士，煮起來一樣咁好味！

低脂白汁素通粉 

材料

通粉70克
雜菇1碗

低脂芝士1/2片

脫脂奶1/3杯

油1茶匙

蒜頭3瓣

(減鈉)鹽少許

蕃茜少許(裝飾用)

做法

1. 按包裝上的指示煮熟通粉，隔水備用。

2. 用1茶匙油爆香蒜頭。

3. 炒熟雜菇。

4. 倒入脫脂奶和低脂芝士碎。

5. 加入通粉，拌勻及收汁即成。

醃青瓜(快速即食版)

材料

青瓜半條

低脂火腿1/2片

鹽少許

芝麻適量

蒜蓉少許

(減鈉)鹽

七味粉或韓式辣粉適量(可略)

做法

1. 將青瓜洗淨，切成幼條。

2. 將低脂火腿切成幼條。

3. 將青瓜和火腿與其他材料混合即成。

4. 可撒上少許芝麻做裝飾。

希望大家都會喜歡呢個便當啦。：）

Have a happy Friday!

Last but not least, 今日喺營養師Kathy個Page度睇到嘅金句。非常之有同感！共勉之。

「如果把減肥看成是一個艱鉅任務，那麼即使減一磅也會覺得十分辛苦；如果把健康飲食當作一種生活態度，那麼即使減二十磅也會覺得十分幸福~」

下半身水腫 vs 健康減鈉鹽

唔知大家有無下半身水腫嘅問題？我以前都試過減極都減唔到個hip位同對象腿！歸根究底就係我食得太鹹，導致水腫。要改善，除咗要食得清淡啲之外，仲可考慮試下用低鈉鹽。

(腎病患者請先諮詢醫生的意見)

同大家介紹呢隻我喺台北買嘅健康減鈉鹽。它比同一個牌子的高級精鹽的鈉含量低50%。香港一般大型超市都有賣類似的減鈉鹽。

鹽吃太多，會增加罹患心臟病和中風的風險。所以即使係減鈉鹽，都要限量使用。：) 其實，鹽裡面的鈉會令血壓上升。因此，要減低患高血壓的風險，平日的飲食真的宜淡不宜濃。

想知道自己平時有冇吸收得太多鹽分，可以睇睇食品包裝上嘅營養標籤。

P.S: 根據世衛發表的最新指引，每個成年人每日鈉攝取量，應低於2000毫克。

《愈睇愈瘦●營養標籤篇》

http://kforkitchen.blogspot.hk/2014/08/blog-post_14.html

一年容易又中秋^^

今年好感恩，因為又有家長送月餅俾我同Adrian食。

我哋要咗一個，並已經將其餘三個送咗俾樓下幾個成日照顧我哋出出入入嘅doormen~

換完榮華，行過美心，即刻好想大讚佢哋嘅新包裝！：）

呢個就係佢哋嘅環保月餅禮盒！目擊好多太太同婆婆，都因為環保、同有個迷你月餅送而選擇咗為地球出一分力。：）多d愛護地球同動物，成個世界都會靚好多。

希望大家都有個充滿愛嘅溫馨佳節，人月兩團圓。:-D

紅米糙米以外的方便選擇

想食得健康啲，又驚齋食白飯會唔夠纖維，除咗紅米糙米之外，其實仲有咩選擇呢？

一般超市都有呢種燕麥飯，但我估唔到嘅係，佳之選嗰一款，比桂格有多一倍纖維。(每100克含12.1克膳食纖維) 我平時食開嘅金鳳，每100克得0.7克膳食纖維咋！留意脂肪%都會比白米同紅米高，但當中近80%都不是飽和脂肪，對心臟沒有害的。

如果驚唔習慣燕麥飯嘅口感，可以考慮用4:1嘅份量開始。未食過都唔洗擔心，其實即係有少少似麥皮咁，但乾身D, 幾好味架，可以考慮買細細包($9.9)試吓先。

燕麥對於想減肥的人來說，的確是一個好幫手！因為燕麥含可溶性纖維，當它吸收了大量的水分之後，會為我們帶來飽腹的感覺，令人不容易感到肚餓，變相又可以吃少一點。

此外，燕麥和大麥、小麥或其他的穀物不同，燕麥再加工之後，仍然保留含大量營養的麩皮和胚芽，可為我們降低心臟病的病發率和血糖水平。

兩袋都有600克，桂格賣＄24.9，佳之選就賣＄20.9。

俾大家參考一下佢建議嘅煮法~

超好用嘅水壺(re-post)

(@ 3/9, blogspot冇啦啦delete咗我尋日篇entry......)
Kay廚房用嘅水壺，非常好用，出水又快！最重要嘅係慳位，呢一點喺香港真係好重要！唯一嘅缺點係唔可以直接倒滾水入去。
約$100起，各大Log-On 有售。
http://www.citysuper.com.hk/Footer-Pages/Store-Locator

P.S: 使用時，請打開少少頂頂個蓋，俾空氣出入，否則水流會較慢。