2015年12月28日

2015年12月24日

【唔好再食M&X朱古力?】

聖誕節同新年最常收到嘅禮物⋯⋯ Top of the list應該都算係朱古力。(我尋日收到朋友嘅禮物,今日一邊影相一邊食咗4塊!有時我自制能力都真係麻麻。)

如果有得揀,我會鍾意食70%或以上嘅黑朱古力。黑朱古力比較食到可可嘅味道,亦都含有較多嘅抗氧化物和較少糖分;揀細細塊嘅包裝就更加容易控制進食嘅份量啦。(一日最多食兩塊)

推介牌子:
Lindt 70% / 85% / 99% 黑朱古力(各大超市有售)
馬莎Swiss Dark Chocolate等等
*糖尿病人可以試吓去卓越嘅一生良品,試試VALOR嘅無糖朱古力。

揀朱古力最緊要係記得睇個成份,如果第一個成份係糖(😅好似好多小朋友都鍾意食嘅'M&X'咁)又或者裡面有棕櫚油同氫化植物油等等嘅成份,就儘量唔好揀啦。因為呢兩種材料會增加血液中嘅壞膽固醇,含有好高嘅飽和脂肪甚至係反式脂肪,長遠對身體有害無益。希望大家都食得健康又安心。

最後,祝大家聖誕快樂呀!🎅

2015年12月9日

一齊行吓Aeon啦

今日去咗行Aeon
咁啱見到幾樣好嘢
一定要介紹俾大家

左上:吸油紙$10.9
有時如果同屋企人食飯,長輩煮咗啲比較油膩嘅餸或湯,呢個產品就會大派用場嘞!一吸即刻會變成全透明,個湯或者個餸會即時清咗好多!

左下:綠巨人無鹽粟米$15.9
夜晚黑我有時唔會食飯,間中會食低卡又有益嘅粟米。如果買唔切新鮮粟米嘅話,開一罐呢啲都OK。(放喺office遇上OT就可以叮熱加低脂沙律醬 + 蛋)(又或者喺屋企加幾舊西蘭花同芝士碎,入爐焗溶佢又係一個健康小食)

右上:極低卡已洗bb甘筍及雜菜$19-20
兩樣嘅卡路里都低到飛起!食一大碗都冇50千卡!佢地勝在有咬口又飽肚,食完開心過兔仔。我今晚晚餐就係食佢哋(同埋去皮鴨胸),如果怕淡茂茂,可以加一至兩湯匙日式芝麻醬(我用1/2 Mizkan金字牌)

右下:(新嘢!)北海道低脂牛奶
北海道牛奶好多人都飲過,但係深藍色嗰款脂肪真係比較高。上個月喺崇光超市見到呢隻低脂版!!!個心即刻興奮到離一離呀!哈!但係要40幾蚊⋯⋯ 所以都冇介紹俾大家。點知今日行Aeon嘅時候都見到,仲只係賣$24.5!有機會買嚟試吓。(我抬咗一盒返屋企,試完再同大家報告啦。)

2015年12月8日

【早餐食乜好?】

同大家分享下我最近做過嘅高纖早餐

🍴藜麥朱古力小鬆餅
(無牛油版本)
🍴奇亞籽牛奶/有機豆乳雜莓杯杯
(一分鐘搞掂,返工首選)
🍴亞麻籽黑裸麥包
(超飽肚,唔怕會偷食)
早餐一定要食得好
否則晏晝都未食就摷零食
減肥計劃就唔容易成功
※◎♡※◎♡※◎♡※◎♡※◎♡※◎♡※◎♡※◎♡※◎♡
《K for Kitchen 瘦身廚房》
加入K for Kitchen 瘦身雜貨店 (已開業)
《K for Kitchen 瘦身廚房》 部落格 / Blog
我的兩本著作:《愈食愈瘦》《愈食愈瘦 2》
Facebook 專頁 (睇更多健康食譜&食物介紹)

※◎♡※◎♡※◎♡※◎♡※◎♡※◎♡※◎♡※◎♡※◎♡

紫薯奇亞籽杯杯蛋糕

紫薯屬於低GI食物,比麵粉和白飯等食物健康。而奇亞籽則是近年大熱的「超級食物」,含超豐富的纖維和蛋白質仲有omega-3,非常飽肚又可以有助減磅。將兩者混合在杯杯蛋糕中,實屬健康的早餐或下午茶之選。
尋日(15/7/2016)做嘅有花生版 ^_^

材料(4中杯)
去皮紫薯蓉70克
奇亞籽2茶匙
無糖豆漿/牛奶80-90毫升
糖45克
植物油(任何)40毫升
大蛋半隻(約30克)
低筋麵粉100克
(無鋁)泡打粉1茶匙
做法
  1. 清洗紫薯表皮,隔水蒸至軟熟。
  2. 把紫薯壓成蓉,備用。
  3. 預熱焗爐至180度。
  4. 將奇亞籽混入豆漿 (可靜待10分鐘)。
  5. 粉類過篩備用。
  6. 混合植物油、豆漿和蛋。
  7. 加入紫薯蓉拌勻。
  8. 將粉類加入。
  9. 輕輕拌勻並倒進紙杯中。
  10. 入爐前,將紙杯在桌上輕敲數下以迫出麵糊中的空氣。
  11. 入爐焗20-22分鐘即成。
小貼士
  1. 糖量可視乎紫薯甜度而定,可試試麵糊再增減。
  2. 如果喜歡香濃的口感,可用冷卻了的牛油溶液(約35克),代替食譜內的植物油。
  3. 不喜歡加入奇亞籽的話,豆漿/牛奶的份量可減至60毫升。
  4. 由於每個爐的火力和紙杯深度不同,請自行調節烘焗的時間。
  5. 可用竹籤插入蛋糕裡,沒有任何黏附物的話,即代表蛋糕已經全熟。



2015年11月26日

南瓜亞麻籽杯子蛋糕

我承認,我以前一直都誤會了南瓜!因為南瓜不單高纖、不易致胖,還含豐富營養、膳食纖纖和胡蘿蔔素,可以幫助我們抗氧化和令腸道更健康!適量食用還可以令皮膚靚靚。一杯重50克的香甜南瓜,更加只有35千卡,乃是做蛋糕或中式糖水的上佳之選。
另一方面,亞麻籽含奧米加三脂肪酸,有助維持心血管和消化系統的健康,而且還能夠加快身體脂肪燃燒的速度。除了用來做蛋糕,磨碎了的亞麻籽,還可以加入果汁、沙律或麵包麵糰中。
以下為超簡易的杯子蛋糕做法,無需打蛋器或其他用具,只需要將所有材料拌勻即可入爐。用植物油代替牛油,不單更健康,器具清洗亦極容易,非常適合我這種懶人。
材料(9中杯)
熟南瓜蓉150克
植物油(任何) 80毫升
低筋麵粉200克
糖80克
鹽1/16茶匙
(無鋁)泡打粉2茶匙
大蛋兩隻(約100克)
牛奶或無糖豆漿80毫升
亞麻籽2湯匙



做法
  1. 焗爐預熱至180度。
  2. 先將南瓜蒸熟,壓成蓉備用。
  3. 亞麻籽磨碎。
  4. 將植物油、糖、鹽和雞蛋拌勻。
  5. 加入已過篩的粉類。
  6. 加入南瓜蓉、豆漿和亞麻籽拌勻。
  7. 將麵糊倒入容器中。
  8. 焗25分鐘即成。
小貼士

  1. 南瓜壓成蓉之後可能會有少量出水,可倒去多餘的水分以免麵糊太濕。
  2. 如喜歡香濃的口感,可用冷卻了的牛油溶液(約70克),代替食譜內的植物油。
  3. 不喜歡加入亞麻籽的話,可以同等份量的藜麥代替。
  4. ※◎♡※◎♡※◎♡※◎♡※◎♡※◎♡※◎♡※◎♡※◎♡
    《K for Kitchen 瘦身廚房》
    加入K for Kitchen 瘦身雜貨店 (已開業)
    《K for Kitchen 瘦身廚房》 部落格 / Blog
    我的兩本著作:《愈食愈瘦》《愈食愈瘦 2》
    Facebook 專頁 (睇更多健康食譜&食物介紹)

    ※◎♡※◎♡※◎♡※◎♡※◎♡※◎♡※◎♡※◎♡※◎♡

2015年11月11日

【Kay第一次收到贊助之 ● Meyer美亞CIRCULON朱古力圈圈鍋】

謝謝美亞送我的新鍋具,耶耶耶!
我嘅煮婦魂又被燃燒到七樓咁高嘞!有冇人同我一樣,收到廚房用品會開心到癲咗?

Anyway, Meyer呢個朱古力圈圈鍋,標榜嘅係底部高低坑紋圈圈嘅專利設計,想搵隻萬用健康易洗嘅鍋,呢隻的確係不二之選!

我用呢個鍋煮咗無油煎蛋、低脂宮保雞件同炒雜錦(素)等等。用咗一段時間,我想講:😽「我想搵隻呢啲易用嘅健康鍋好耐嘞!!」

喺未詳細介紹個鍋之前,先同大家分享宮保雞件個食譜先吖。

低脂宮保雞件(3-4人份)
宮保雞丁屬於多油重味嘅菜式。但今次嘅做法,完全不用油炸,靠呢個鍋嘅專利凹凸紋設計,先將低脂嘅雞件煎香,再靠花椒油同其他調味料,做出酸酸甜甜輕麻醒胃嘅效果。

材料
急凍雞髀3隻(請凍肉店切件)
(雞上髀去皮:屬非常低脂部分、香滑又好味!)
乾辣椒適量(唔辣,取其色澤)
薑5片
乾蔥3粒
蒜頭3瓣
蔥段適量
花生/腰果適量

醃料
豉油1.5湯匙
麻油1茶匙
胡椒粉適量
生粉適量
糖1茶匙
水2-3湯匙
(打水令雞肉更香滑)

醬汁
生抽1湯匙
糖1湯匙
烏醋1湯匙
酒1茶匙
花椒油1-2茶匙(取其麻香,不喜可略)
(如果冇花椒油,用一湯匙花椒代替亦可。)

做法
1. 用一至兩茶匙油起鑊,爆香乾辣椒、薑片、乾蔥和蒜頭。
2. 加入雞件,用中大火兩面各煎三分鐘。
3. 加一湯匙水,上蓋焗至雞件九成熟。
4. 加入醬汁煮一至兩分鐘。
5. 最後,加入蔥段和花生即可。
有關美亞呢個朱古力圈圈鍋:
*獨特的底部高低坑紋圈圈專利設計,有效減少油脂攝入;
*高低坑紋可減少油脂吸附在食物上,煎完食物之後的油脂,會流向凹槽,變相又食少啲脂肪;
*煎/煮完嘢之後,可直接上枱,清洗也極容易。
*11月30日前,喺美亞觀塘旗艦店、各大百貨公司及超市專櫃購買CIRCULON朱古力圈圈鍋系列,都有七折優惠。(適用於任何爐具)
(我用呢款30.5cm 未折前係$1099)

2015年11月9日

低卡雜錦小炒(素食)

***食少啲肉,唔單止會對地球好啲;食多啲纖維仲可以幫我地吸走多餘嘅脂肪排出體外架。所以,記得每日都要儘量吸收足夠嘅纖維啊!



我以前係食肉獸,宜家為身體為地球同動物,有時都會間中食吓齋。今次呢味餸好味都暈,屬於第二日帶飯都仲咁好食嘅類別!呢輪又同同事夾份訂返曉峰有機菜,試咗包我好憎食嘅荷蘭豆⋯⋯ 嘩!好好味呀~~~~~(味吉洋一tone)(年紀大,口味原來真係會改變架!荷蘭豆宜家做咗我最新嘅best friend~!)


而秋天呢其實係品嚐蓮藕嘅最佳時節。(講起秋天,好耐冇見,唔知佢去左邊,今日真係好熱哦~!) 蓮藕飽肚,有膳食纖維同丹寧酸等等,可以幫我地抗氧化同促進胃腸蠕動。木耳嘅益處就更加唔洗我多講啦~~ 希望大家諗帶飯帶咩餸好嘅時候,考慮下食多D飽肚嘅菜啦。


材料
年藕1段(手心大)
貓耳朵或普通木耳1把
荷蘭豆1碗
紅蘿蔔1舊(手心大)
粟米芯8-10條
薑、乾蔥適量


調味料
油1湯匙
蠔油2-3湯匙
味醂或酒1湯匙
麻油少許(可略)


做法
  1. 貓耳朵洗淨浸軟。
  2. 年藕和紅蘿蔔切極薄片。
  3. 荷蘭豆和粟米芯洗淨備用。
  4. 用一湯匙油起鑊。
  5. 爆香薑和乾蔥。
  6. 先放蓮藕貓、耳朵和紅蘿蔔炒一炒。
  7. 加入少許清水再上蓋,以中火煮五分鐘至八成熟。
  8. 加入蠔油、味醂、荷蘭豆及粟米芯。
  9. 再上蓋煮約三分鐘。
  10. 待所有材料熟透之後,加入少許麻油即可上碟。


小貼士
1. 糖尿病患者同容易胃氣脹嘅朋友請限量進食年藕。
2. 年藕係澱粉類,該餐可考慮減飯。
3. 如果唔切薄片,就請酌量增加烹調嘅時間。

2015年10月16日

無油濃香蛋餅


我好鍾意食蛋😁
水煮蛋🍳太陽蛋🍳炒滑蛋🍳蒸水蛋
通通都鍾意食
貪佢熱量低又營養豐富
但如果整蛋角
又怕要落好多油煎先好味
上個禮拜發現俾我打咗入冷宮嘅氣炸鍋
(用焗爐都得)
可以一滴油都唔使用
十分鐘內就煮到一味餸
真心易到⋯⋯有啲感動
嗰吓即刻令我嘅煮婦魂再次燃燒‼️
星期六日搵機會整吓呢個【無油濃香蛋餅】吖
【材料】🍴
我今次用咗極瘦嘅「佳之選加拿大式牌煙肉片」(似瘦火腿咁,之前有介紹過。營養師都推薦,兩塊等於一份肉。)
如果想再均衡一啲
仲可以加埋三色椒、菠菜
又或者係甘筍幼粒
有quota嘅朋友
不妨可以加少少牛奶🍼
令到成個菜口感更加豐富同滑溜
落幾多隻蛋就要睇你quota嘞
一隻大蛋一份肉
唔食黃就兩隻蛋白一份肉
自己換算就唔怕食大咗啦
【做法】(二人份)
四隻蛋+兩小片火腿切絲(共5份肉)+黑椒少許
打勻之後
加入已預熱至180度嘅氣炸鍋/焗爐內
焗約6-8分鐘便OK
視乎你要食幾熟啦
配碟菜+五穀飯或其他高纖飯/主食就又一餐囉

【小貼士】
我唔會落鹽調味
因為瘦煙肉已經有味
寧願真係淡到食唔落先後加啦
咁樣會健康 +容易控制啲

【關於膽固醇】
最新研究顯示,過量攝取飽和脂肪,才會令血液中的膽固醇上升;而雞蛋和海鮮中的膳食膽固醇,則對血液中的膽固醇影響不大。如果要有效控制體內膽固醇,最好是減少食用飽和及反式脂肪。(即肥肉及動物油脂等)

2015年10月10日

【韓星減肥法@飲食男女】

韓國女星個個都樣靚身材正
佢地嘅減磅秘密係咩呢
成效又如何呢?想知?
快啲睇吓我喺《飲食男女》嘅第三個video啦


多謝各位click click / like like 支持呀
Thank you thank you all  *\(^o^)/*


P.S: 我真心係水腫王,導演都話我塊面嗰日比平時明顯肥咗 (´・_・`) 好在今日已經回復正常。




2015年9月20日

減肥都可以食海鮮

【深夜放毒系列】

減肥都可以食海鮮/食好啲
其實好多海鮮嘅蛋白質豐富
有啲朋友可能會誤會咗
以為鮮魷同生蠔係膽固醇好高嘅食物
只要唔好食內臟同埋蟹膏
就唔需要太擔心膽固醇嘅問題
好多膽固醇其實唔係食返嚟㗎

今晚我用咗少少清湯煮辣酒東風螺
仲有清蒸貴花蚌
底層放咗粉絲/芋絲墊底
佢哋吸曬所有精華
食起嚟清清甜甜
見到愛人滿足嘅笑容
更辛苦都值得


最後就係奄仔蟹花雕蒸蛋白
雖然蛋白蒸得唔算好靚
但總算好滑溜
愛人見到咁多蟹膏
笑到見牙唔見眼

2015年9月13日

Myth or Science

明珠台
Myth or Science 節目
(第2-3集精華)

近排睇咗逢星期四930喺明珠台播嘅呢個節目,好好睇!我撮寫咗當中有趣嘅部分俾大家參考。有興趣可上Mytv網上重溫。(現只剩第三集可重溫,要睇就要快手嘞)

1. 關於餐具同食量
食淺色嘅嘢(如:飯)用深色嘅細碗/碟
食深色嘅嘢(如:牛扒)用淺色嘅細碗/碟
用細啲嘅碟!我地會因為視覺上嘅誤差而食少咗!
唔好睇少呢個差異,如每日只係食少100千卡,足以令人一年輕10.4磅!

2. 咖啡因可以提升記憶力!
咖啡唔會令身體缺水
但咖啡唔係人人都啱飲
要睇有冇某隻酵素
如果冇,可選擇一日一杯或者飲decaffine 

3. 關於運動:
1小時嘅室外帶氧運動會令身體流失3.5公升嘅水分,運動完記得補水。
*****做運動會令膚質變好!*****
我絕對要再努力啲呀,因為呢排發現開始有較明顯嘅皺紋!

4. 肥就一定冇咁fit?? 
BMI高+內臟脂肪多啲都可以好fit?? 
原來呢啲朋友唔一定比BMI正常+較少脂肪組織嘅人身體差啲!佢地嘅運動表現可以較好+
患某啲病嘅機會反而會低啲啲。
(個人認為,(內臟)脂肪都係「寧缺勿濫」啦)

5. 血型減肥法有冇用呢?--》冇!

6. 海鹽、猶太鹽係唔係真係比餐桌鹽健康?--》NO! 佢哋含嘅鈉都係一樣,多食始終影響健康。

7. 黃糖、蜜糖以及龍舌蘭糖漿係唔係比白砂糖健康?--》NO. 糖就係糖,本質一樣都係高熱量低營養嘅食物。(原糖raw sugar據稱會好啲~~)

*雖然節目內部分嘅實驗方法可能未係好完美,但大部分都有比較大型嘅研究支持,所以都值得參考。

2015年9月10日

微卡晚餐!

去旅行又或者係外食食多咗,往後想調整嘅話,最好就係放工早啲返屋企,食一個微卡晚餐,將之前增加咗嘅體重一一減返返嚟!

同大家分享一個我間中都會食嘅微卡晚餐吖:

材料
鏗魚高湯/昆布高湯/清水加鹽/雞湯適量
冬菇或冬菇片適量
紹菜/椰菜適量
芋絲1盒
瘦肉碎3湯匙

(除肉碎外,其他材料都寫「適量」,因為都是微卡啦,可以放心吃到飽!YEAH!)

做法
1. 瘦肉碎(請選超瘦肉)可直接烹調,也可以用少許的豉油、糖和生粉先調味。冬菇洗淨浸軟。
2. 用1-2茶匙油、薑和蒜(可略)起鑊。
3. 先炒熟肉碎。
4. 加入所有蔬菜、菇片和高湯以中火煮約十分鐘。
5. 上碟前3分鐘,加入芋絲煮熟即可。

小貼士
1. 這個微卡晚餐,當午餐一樣可以。
2. 胃部較弱嘅朋友要適量進食,因為芋絲比較難消化。
3. 部分芋絲可能會有少許「味道」,可用滾水沖洗一下,加上高湯即可癖味。

2015年9月9日

傳統月餅 vs 冰皮月餅 vs 低糖月餅

減肥遇上中秋節應該點算好?過時過節當然要食啲應節食品,但點先可以食得健康啲呢?屋企已經有好多月餅,點先可以減少誘惑又可以造福社會呢?


月餅嘅款式愈來愈多,我尋日就喺SOGO見到「六黃白蓮蓉」!!當然唔少得近年好流行、一餅難求嘅「美心流心月餅」啦。除此之外,市面上仲有傳統嘅雙黃白蓮蓉、五仁月餅、奶黃月餅、黑松露月餅同埋其他用生果作為餡料嘅冰皮月餅等等。


傳統月餅一般係由豬油、糖同埋蓮蓉製成;但近年大家嘅健康意識提高咗,好多月餅都改用植物油嚟製造。但要留意返,佢哋嘅總脂肪同卡路里其實係冇減少到㗎。(1毫升油=9千卡)


傳統月餅每100克有超過20克嘅脂肪(1.3湯匙)同近50克嘅糖(12.5茶匙)!而冰皮月餅其實都不遑多讓,每件嘅size細啲,但每100克嘅糖分亦有接近50克!絕對係屬於高糖嘅食品。
圖片來源:明報新聞網


¼個傳統月餅 vs 1個冰皮月餅
但當然,好少人會每日食一個月餅,所以又唔需要太過擔心。^_^ 咁如果每次只係食¼個傳統月餅(約46克),又有幾多卡路里呢?


¼個傳統月餅(46克),大概就有:
約200千卡(即約1碗飯)
2茶匙嘅脂肪
5.8茶匙嘅糖
咁一個迷你冰皮月餅(55克)又點呢?
(比較時要留意重量比傳統月餅重20%左右)
約183-200千卡(都係約1碗飯)
1.7茶匙嘅脂肪(平均幾隻味嘅數值)
3-4茶匙嘅糖
冰皮月餅之中,奶黃同以榴槤作餡嘅冰皮月餅會比較高卡。美X嘅冰皮月餅一般會比X班低卡低油。而其他牌子(如聖X娜)嘅冰皮月餅,就同美X所含嘅卡路里差唔多。
所以話呢,冰皮月餅嘅油同糖始終較傳統月餅低啲啲。個人認為,食月餅最緊要係揀一啲不含反式脂肪、低飽和脂肪同埋低糖嘅款式。當然,如果想少食多滋味,食迷你冰皮會比較好控制

低糖月餅嘅選擇
低糖月餅同傳統月餅嘅卡路里睇起嚟分別唔係太大,但係低糖月餅採用嘅糖GI值比較低,對糖尿病又或者一般關注健康嘅人士都有好處。此外,唔講唔知,低糖月餅所採用嘅麥芽糖醇,人體只會吸收一半,另外一半會自然排出。咁即係話,食100克嘅糖,我哋實際吸收只有50克咋!想搵低糖嘅月餅,可以去美心、榮華、奇華同埋鴻星睇睇。

食月餅小貼士
1. 食傳統月餅嘅話,女士每次食¼個就已經係上限,如果食冰皮,可以兩個人分享一個吖。


2. 月餅食多咗嘅話,可以選擇減少正餐嘅飯量。例如晏晝食咗半個傳統月餅嘅話,夜晚可以食少碗飯。(但唔可以將cut飯+食snacks當成一個習慣)


3. 如果你好幸福,屋企有好多自己買或者係人哋送嘅月餅;Kay建議大家,可以考慮送俾街上嘅拾荒公公同婆婆 / 朝早喺地鐵收報紙嘅老人。Kay覺得咁樣嘅中秋會更有意義。如果你有好多月餅打算捐出,請考慮捐俾救世軍或其他社福機構。


救世軍「心好月圓」中秋行動
尚欠三千個月餅 請即捐餅支持


其他接受月餅捐贈嘅機構名單(2014)


***歡迎大家提供更多機構名單***


捐贈月餅時須注意:
1. 未必需要整盒捐贈,獨立包裝(單個裝)的也可以。
2. 檢查是否未過食用日期。
3. 一般不會接受冰皮月餅或雪糕月餅的捐贈。

4. 如果有低糖月餅,可特別註明給長者。